‘सरकारलिसेया सहकार्य त्वाःदलेफु’

येँ – संघीय समाजवादी फोरम नेपालया सहअध्यक्ष राजेन्द्रप्रसाद श्रेष्ठं थःगु पार्टी सरकारय् सहभागि जूगु च्याला दयेधुंकाः नं संविधान संशोधनया निंतिं छुं हे पलाः मन्ह्याकूगु धासें असन्तुष्टि प्वंकादीगु दु । वय्कलं प्रधानमन्त्री केपी शर्मा ओली नेतृत्वया सरकारं थःपिंलिसे याःगु निगू बुँदाया सहमति कथं संविधान संशोधनया सन्दर्भय् छुं पलाः मन्ह्याकूगु व थःगु एकल सरकार थें यानाः यकःति धंगं न्ह्याः वनेगु स्वत धाःसा सरकारलिसेया सहकार्य त्वःदले फइगु ख्याच्वः नं बियादिल ।

उगु खँ वय्कलं पार्टीया धादिङ जिल्ला तदर्थ समिति गठनया निंतिं धुनीबेसीइ जूगु धादिङ जिल्ला भेलायात संबोधन यायेगु झ्वलय् धयादीगु खः । प्रतिनिधिसभा सदस्य तकं जुयादीम्ह श्रेष्ठं संविधान संशोधनया निंतिं ओली नेतृत्वया वर्तमान सरकारं पलाः मन्ह्याकूगु जक मखु संयुक्त सरकारया आभास तकं जुइ फयाच्वंगु मदु धयादिल ।

वय्कलं राजदूत व संवैधानिक आयोगया प्रमुख नियुक्तिइ थःगु पार्टी व पार्टी दुने नं थःगु गुटया समर्थन याइपिंत जक नियुक्ति यानाः संवैधानिक अंगय् तकं पार्टीकरण व गुटकरण यानाच्वंगु द्वपं बियादिल । संविधान संशोधन लगायतया विषयय् जूगु सहमति याकनं कार्यान्वयन यायेत थःगु पार्टीं स्मरण पौतकं लःल्हाये धुंगु धासें वय्कलं धयादिल, ‘आः ताःई पियाच्वने फइमखु, प्रधानमन्त्री थः याकःचा जक वनेगु प्रवृत्ति जारी जुयाच्वन धाःसा सहकार्य त्वाःदलेफु ।’

ससफोय् एकीकृत जूगु हाम्रो कम्युनिष्ट पार्टीया धादिङ जिल्लाया नेता इन्द्रमान श्रेष्ठया सभापतित्वय् जूगु भेलाय् पार्टी केन्द्रीय दुजःपिं प्रदेश नं. ३ या अध्यक्ष लालबहादुर तामांग, ताम्सालिङ समितिया अध्यक्ष कृष्णकुमार घलान, शिल्पी महासंघया ३ नं. प्रदेश इन्चार्ज मोहन बराइली लगायतं थःथःगु नुगःखँ तयादीगु खः । भेलां श्रेष्ठया हे अध्यक्षताय् नीछम्हेसिया ससफो धादिङ जिल्ला तदर्थ समिति नं गठन याःगु खः ।

सम्बन्धित बुखँ

LEAVE YOUR COMMENTS