पुनःनिर्माणया जानकारी बीत सूचना प्रणाली
राष्ट्रिय पुनःनिर्माण प्राधिकरणं पुनःनिर्माणया प्रगति बारे सुचं वा जानकारी बीगु ल्याखं सूचना प्रणाली (एप्स) संचालनय् हःगु दु । प्राधिकरणं उगु सूचना प्रणालीया सार्वजनिक नं यायेधुंकूगु दु । प्राधिकरणं पुनःनिर्माणया झ्वलय् स्थलगत रुपं खटे जुइपिं इन्जिनियरतय्सं जानकारी बी फइगु नापं प्रगतिया विवरण जायेका फइकथं उगु प्रणालीया विकास यानाः संचालनय् हःगु खः । प्राधिकरणं उगु सूचना प्रणाली एसियाली विकास बैंक (एडीबी)या आर्थिक ग्वाहालिं निर्माण याःगु खः । सूचना प्रणालीइ २०७२ साल बैशाख १२ गतेया तःभुखाचं प्रभावित ३२ गू जिल्लाया स्थानीय तहया वडाय् पुनःनिर्माणय् खटे जुयाच्वंपिं इन्जिनियरं थःपिं खटे जुया वनाच्वंगु क्षेत्रय् जूगु पुनःनिर्माणया प्रगति व तथ्यांक तये फइ ।
उगु प्रणाली प्रयोगया निंतिं इन्जिनियरतय्त ‘युजर नेम’ व ‘पासवर्ड’ उपलब्ध याकी । इन्जिनियरतय्सं थःपिं खटे जुयावंगु कार्यस्थलं सूचना व प्रगति विवरण तये फइ । तर उकियात सम्पादन यायेगु ज्या धाःसा प्राधिकरणया केन्द्रं जक याये फइ । प्राधिकरणया प्रमुख कार्यकारी अधिकृत युवराज भुसालं प्रणाली सार्वजनिक यासें पुनःनिर्माणय् विनियोजन जूगु खर्चया सदुपयोग छु गुकथं जुयाच्वंगु दु अले प्रगतिया ज्या गुकथं न्ह्यानाच्वंगु धइगु खँ सीकेत ग्वाहालि जुइ धयादिल । ‘पुनःनिर्माणयात पारदर्शी, जवाफदेही व सुशासनयुक्त दयेकेत उगु प्रणालीं ग्वाहालि याइ । इन्जिनियरं थःगु कार्यस्थलं ‘अपलोड’ याःगु सूचना प्राधिकरणया केन्द्रीय प्रणालीइ वइ ।
केन्द्रय् वये धुंकाः गनया पुनःनिर्माणया अवस्था छु गथे दु धइगु अनुथमन यानाः सम्बन्धित थासय् माःगु सुधार यायेगु ज्या जुइ, थुकिं नःनिर्माणया ज्या याकनं क्वचायेकेत नं ग्वाहालि जुइगु विश्वास यानागु दु’, वय्कलं धयादिल ।सूचना प्रणाली प्रयोग अर्थात प्रणालीइ सूचना तयेत इन्जिनियरतय्त याकनं छगू तालिम बीगु तयारी नं यानागु प्राधिकरणं न्ह्यथंगु दु । प्राधिकरणं संचालनय् हःगु प्रणालीइ निजी आवास, सरकारी भवन, पुरातात्विक महत्वया सम्पदा, विद्यालय, स्वास्थ्य संस्था लगायत सकतांकथंया संरचना पुनःनिर्माणया तथ्यांक दुथ्याकीगु जुयाच्वंगु दु । प्राधिकरणया सचिव मधुसुदन अधिकारीं जिल्ला समन्वय समितिया सचिवालयं जिल्लान्यंकंया खर्च व प्रगति विवरण प्रणालीइ तइगु जानकारी बियादिल ।
पुनःनिर्माणसम्बन्धी ठेक्कापट्टाया विवरण नं जिल्ला सचिवालय व केन्द्रं हे तइगु जूगु दु । सूचना प्रणाली सार्वजनिकीकरण ज्याझ्वलय् एडीबीया देशीय निर्देशक मुख्तर खामुदखानोभं पुनःनिर्माणया अनुगमनया निंतिं थुगु विधि उपयुक्त जूगु धयादिल । ‘पुनःनिर्माणया प्रगति व मेमेगु सम्बन्ध्ति सूचं वा जानकारी कार्यस्थलं याकनं काये फइ । थुकिं यानाः आयोजना कार्यान्वयनय् नं तःधंगु हिउपाः हइगु विश्वास यानागु दु’, वय्कलं धयादिल ।
थुगु प्रणालीपाखें सूचना वयेगु शुरु जुइवं सेवा सुविधा म्हो जूगु थासय् अप्वयेके फइगु धाःगु दु । प्राधिकरणं प्रगति विवरण बुझे याइगु दक्वं निकायय् प्रणालीपाखें सुचं बीगु नं व्यवस्था यानातःगु दु । संचारकःमि नापं नागरिकं नं स्वये फइकथं खुल्ला प्रणालीया विकास यायेगु व उकिया विकास लिपा विश्वया न्ह्यागु थासय् च्वंपिं नेपाःमितय्सं नं पुनःनिर्माणय् जूगु प्रगति व उकिया निंतिं जूगु खर्चया विवरण सीके अःपुइगु जूगु दु ।
पुनःनिर्माणय् संलग्न विकास साझेदार, इमिसं खर्च याइगु बजेटगायतया सुचं नं प्रणालीपाखें जानकारी काये फइ । थ्व हे झ्वलय् प्रतिनिधिसभा व प्रदेशसभा निर्वाचन लिपा निगूगु व स्वंगूगु किस्ता दावी याइपिं सेवाग्रहीया संख्या अप्वःगु प्राधिकरणं न्ह्यथंगु दुसा अथे हे आतकया दुने छगू लाख निजी आवास निर्माण जुइ धुंकूगु दु । थुकथं प्राधिकरणं बिउगु जानकारी कथं स्वंगू लाख नीन्याद्वः स्वयां अप्वः छेँखा पुनःनिर्माण शुरु जूगु दुसा न्हय्गू लाख ख्वीन्हय्द्वः लाभग्राही प्रमाणीकरण जूगुलिं करिब छगू लाखं अनुदान सम्झौता याःगु मदु । आवास पुनःनिर्माणया निंतिं जग्गा मदुपिं व मेगु थासय् आवास दुपिं लाभग्राहीं अनुदान सम्झौता याः मवःगु खः ।
LEAVE YOUR COMMENTS