२ नम्बर प्रदेशय् भाषा विवाद

येँ – पहिचान आन्दोलनय् दकलय् न्ह्यःने च्वनाः ल्वाःगु २ नम्बर प्रदेशय् भाषाया विवाद पिहां वःगु दु । खास यानाः संघीय समा–जवादी फोरम व राजपाया सांसदतय्सं सदनय् हिन्दी भासं सम्बोधन याःगु खँयात कयाः विवाद पिदंगु खः । प्रदेशया मैथिली, भोजपुरी, अवधि, बज्जिका भाषाप्रेमितय्सं सदनय् हिन्दी भासं सम्बोधन याःपिं सांसदतय्त सचेत यासें हिन्दी विदेशी भाषा जूगु कारणं मधेस प्रदेश दुने हे च्वंगु थीथी नेपाली मांभासं सम्बोधन यायेत इनाप याःगु दु ।‘परिवर्तनका लागि युवा अभियान’ नां दुगु छगू ल्याय्म्हतय्गु संस्थां हिन्दी न्ववाःपिं सांसदतय्गु पुत्ला समेत च्याकाः विरोध याःगु खः ।

अभियानया अभियन्तातय्सं मधेस प्रदेशय् मैथिली, भोजपुरी व बज्जिका भाषायात सम्पर्क भाषाया रुपय् मान्यता बीमाः धकाः नं माग याःगु दु । आः प्रदेशय् सरकारी ज्याखँया भाय् नं थुपिं हे जुइमाः धकाः उमिसं माग यानाच्वंगु दु । प्रदेशसभाय् सम्बोधन यायेगु झ्वलय् फोरम व राजपाया सांसदतय्सं हिन्दी भासं न्ववाःगु खःसा एमाले, माओवादी व कांग्रेसया सांसदतय्सं मैथिली व भोजपुरी भासं सम्बोधन याःगु खः । २ नम्बर प्रदेशया सांसदतय्सं शपथ ग्रहण याःबलय् नं हिन्दी समेत प्रयोग याःगु खः ।

आः थ्व प्रदेशय् सरकार तकं थ्वहे निगू पार्टी फोरम व राजपा मिले जुयाः गठन जुइत्यंगु दु । यदि उमिसं हिन्दीयात सम्पर्क भाषाया मान्यता बीगु कुतः यात धाःसा कांग्रेस, एमाले व माओवादी सांसदतय्सं हे अःखतं पहिचानया मुद्दा ल्ह्वनाः विरोध याइगु सम्भावना पिहां वःगु दु । पहिचानया मुद्दा ल्ह्वनाः आन्दोलन याःपिं फोरम व राजपां हिन्दीयात सम्पर्क भाषाया मान्यता बियाः मेमेगु भाषाया पहिचानयात मदयेका छ्वयेत स्वःगु द्वपं वःगु दु ।