ने. सं. ११४४ कौलाथ्व पारू - नःलास्वनेगु

वन्यजन्तु लही दइगु नियमया विरोध

येँ – छुं निश्चित जातिया वन्यजन्तुयात आः छेँय् लहिनाः मी तकं दइ धकाः सरकारं नकतिनि दयेकूगु नियमयात वन्यजन्तु संरक्षणवादी तय्सं विरोध याना हःगु दु । न्हापा न्याये–मी मदुपिनि धलखय् लाकातःपिं कस्तुरी मृग, जरायो, नीलगाई, सर्प, कालीज आदि थेंज्याःपिं पशुपंक्षी नं थःगु हे छेँय् लहीगु, प्रजनन यायेगु मीगु तक अधिकार बियाः सरकारं न्हूगु नियम हःगु खः ।

तर वन्यजन्तु संरक्षणवादीतय्सं धाःसा जंगलय् च्वनेमाःपिं वन्यजन्तुयात थथे छेँय् लहीगु धइगु हे अमानवीय ज्या खः धासें उकिया विरोध याःगु दु । वन्यजन्तुया अधिकार रक्षा याइपिनि संगठन फेडरेशन अफ एनिमल वेलफेयरपाखें जंगलय् च्वनीपिं पशु पंक्षीया थःगु हे स्वभाव व प्रकृति दइ धासें उमित कुनाः लहीगु धइगु हे दुःख बीगु खः धासें सरकारं हयेत्यंगु थ्व नियमयात कानुनी हाथ्या बीगु ख्याच्वः बिउगु दु ।

सरकारं थ्व वन्यजन्तुयात छुं नं कथंया सास्ती मबीकेगु लागिं कानूनय् कडा व्यवस्था यानागु दु धाःसां संरक्षणवादीतय्सं धाःसा वन्यजन्तु यात कुनाः लहीगु हे अमानवीय ज्या खः धासें उमित न्ह्याक्व हे बांलाक लही धाःसां पाय्छि मजुइगु तर्क न्ह्यःने तःगु दु । लहिनातःपिं वन्यजन्तु मी दु धइगु थ्व कानूनया दुरुपयोग जुल धाःसा उकिं जंगलय् तयाः संरक्षण याना तःपिं वन्यजन्तुयात समेत खतरा वये फुगु खँय् नं संरक्षणवादीतय्सं सरकारया ध्यानाकर्षण याःगु दु ।