ने. सं. ११४४ ञलाथ्व नवमी -

किपुली न्यासःगू क्षमताया क्वारेन्टाइन

येँ (रासस) – कोरोना भाइरसया उच्च जोखिमयात ध्यानय् तयाः किपू नगरपालिकां न्यासः क्षमताया क्वारेन्टाइनस्थल दयेकूगु दु । नगरपालिकाया झिगुलिं वडाय् थ्व क्वारेन्टाइन दयेकागु खँ नगरपालिकाया उपप्रमुख व प्रवक्ता सरस्वती रिमालं धयादीगु दु । अथेहे वय्कलं नगरपालिका दुने लाःगु त्रिभुवन विश्वविद्यालया विज्ञान कक्षय् ५० म्हेसिया निंतिं आइसोलेसन कक्ष दयेकागु खँ नं धयादीगु दु ।

अथेहे वय्कलं कोभिड १९ बारे सचेतनाया निंतिं त्वाःत्वालय् साब्वं लः तयेगु, स्यानिटाइजर यायेगु व नगर दुनेया स्वास्थ्यकमीपिंत ३० थान पिपिइ थःपिंसं हे निर्माण यानाः वितरण यानागु खँ नं धयादीगु दु ।

अथेहे वय्कलं थ्व इलय् सुनां नं हाकुबजाः यात धाःसा कानुन कथं कारवाही यायेगु धासें थःपिंसं बजाःया अनुगमन नं तच्वयेकागु खँ धयादीगु दु । अथेहे वय्कलं किपू नगरपालिकां स्वलायात गाक्क जाकि, दाल, व चिकंया मौज्दात दुगु खँ नं धयादीगु दु ।

वय्कलं बजारय् एभरेस्ट, नेपाल व बाबा ग्यासया अभाव जूगु उपभोक्तातय्गु गुनासो वःसां मेमेगु खाद्य पदार्थया समस्या मदुगु खँ धयादीगु दु । अथेहे विदेशय् वयाः किपू नगरपालिका दुने च्वनाच्वंपिंत होम क्वारेन्टाइनय् च्वनेत निर्देशन बियागु खँ नं धयादीगु दु ।

लकडाउनया इलय् नगरपालिकाय् दुगु न्हय्गुलिं स्वास्थ्य चौकी, स्वंगू शहरी स्वास्थ्य केन्द्र, किपू अस्पताल व विष्णुदेवी अस्पतालयात चायेका हे तयेत निर्देशन बियागु खँ नं वय्कलं जानकारी बियादीगु दु ।