जात्रापर्व भीडभाड जुइक मन्यायेकेत येँ मनपाया सार्वजनिक इनाप

येँ- विश्वन्यंकं महामारी जुयाः न्यना वनाच्वंगु कोरोना भाइरसपाखें थः बचे जुयाः मेपिंत नं बचे यायेगु लागिं येँ महानगरपालिकां आः न्ह्यःने वयाच्वंगु नेवाःतय् थीथी जात्रा, पर्वत परम्परागत जक विधि पूवंकाः भीडभाड मयासे जात्रा हनेत इनाप याःगु दु ।
म्हिगः च्वंगु कामपा आकस्मिक बोर्ड बैठकं थ्व निर्णय याःगु खः । लिसें महानगर दुनेया देगः, चैत्य, गुम्बा, चर्च, मस्जिद थेंज्याःगु धार्मिकस्थलय् नं भीडभाड जुइक मुनेगु व संस्कारजन्य भ्वय् आदि मयायेत नं इनाप याःगु दु । अथे हे अज्याःगु भ्वजय् सुनां सःता हल धाःसा अन सहभागी मजुइत नं इनाप याःगु दु ।

सरकारं २५ म्ह स्वयां अप्वः मनू मुनीगु छुं नं ज्याझ्वः मयायेत निर्देशन बिउगुलिं मनपां नं महानगर दुने २५ म्ह स्वयां अप्वः मनू मुनीगु छुं नं ज्या मयायेत इनाप याःगु दु । लिसें अज्याःगु ज्या गनं जुल धाःसा उकी मनपाया सुं नं पदाधिकारी सहभागी मजुइगु नं निर्णय याःगु दु ।
मनपा दुने अज्याःगु प्रकृतिया ज्या यायेगु लागिं मनपां सुयातं आर्थिक ग्वाहालि उपलब्ध मयायेगु निर्णय नं बैठकं याःगु दु ।

बजारय् थौंकन्हय् स्यानिटाइजर व मास्कया अभाव जुयाच्वंगु खँयात ध्यानय् तयाः मनपां अज्याःगु मास्क व स्यानिटाइजर न्यानाः थीथी स्वास्थ्य सम्बन्धी डेस्कं नगरवासीयात निःशुल्क इनेगु निर्णय नं याःगु दु । स्यानिटाइजर न्यायेगु लागिं खरिद प्रक्रिया समेत शुरु जूगु दुसा मास्क न्यायेगु लागिं नं मालेगु ज्या शुरु जूगु दु । छुं न्हि न्ह्यः येँया थीथी थासय् प्रहरीं बरामद याःगु मास्क नं मनपां न्याना कायेगु लागिं इनाप याःगु दु । उगु मास्क नगरय् निःशुल्क इनेगु मनपाया ग्वसाः दु । कोरोना भाइरसपाखें बचे जुइगु लागिं छु यायेमाः व छु यायेम्वाः धकाः मनपां नेवाः व खस नेपाली भासं प्रचार सामग्री पिथनाः वितरण यायेगु निर्णय नं याःगु दु । अथे हे मनपां थीथी सञ्चार माध्यमपाखें थुकिया प्रचार यायेगु नं ग्वसाः दयेकूगु दु ।

थ्वहे इलय् बजारय् खाद्यान्न लगायत वासःतासः सुचुकाः मीपिं व्यापारीतय्त कारवाही यायेगु लागिं मनपां नं कडा अनुगमन यायेगु निर्णय नं याःगु दु । मनपाया थ्व निर्णय लिपा आः न्ह्यःने वयाच्वंगु जनबहाःद्यःया जात्रा गय् यानाः सञ्चालन यायेगु धकाः थौं सम्बन्धित गुथिया बैठक च्वनेत्यंगु खँ सीदुगु दु । यक्व भीडभाड मुंके मजिउगु जूगुलिं जनबहाःद्यःयात थुगुसी रथय् मतसे खतय् जक तयाः देय् चाःहीकाः जात्रा सम्पन्न याये माली धइगु सुझाव वयाच्वंगु खँ सीदुगु दु ।