टिकटकय् अन्तरिम आदेश मवल

येँ (नेपालभाषा टाइम्स)- टिकटक बन्द यायेगु सरकारया निर्णय विरुद्ध लाःगु रिटय् कारण देखाउ आदेश जारी याःगु दु । तर फैसला मजूतले टिकटक खुले यायेगु कथं अन्तरिम आदेश जारी यायेमाः धकाः निवेदकतय्सं याःगु इनापयात धाःसा खारेज याना बिउगु दु ।

टिकटकय् आपालं अराजक व अवाञ्छित सामग्रीत पिहां वल धइगु त्वहः तयाः सरकारं वंगु स्वन्ति ताकाय् टिकटक बन्द यायेगु निर्णय याःगु खः । सरकारया उगु निर्णय विरुद्ध सर्वोच्च अदालतय् ११ गू अलग अलग रिट दर्ता जूगु खः । उगु हे रिटयात कयाः म्हिगः जूगु सुनुवाइलय् सरकार विरुद्ध कारण देखाउ आदेश जारी जूगु खःसां अन्तरिम आदेश धाःसा जारी मजूगु खः ।

सरकारं टिकटक बन्द यायेवं थुकिया प्रयोगकर्तातय्सं मेमेगु च्यानल छ्यलाः टिकटक प्रयोग शुरु यानाच्वंगु दु । थुकिं यानाः मेमेगु च्यानलय् समस्या समेत शुरु जूगु खँ नं धाःगु दु ।