फुक्क हे प्रदेशतय्गु विकास खर्च ६ प्रतिशत जक
येँ – देशय् लागू जुयाच्वंगु संघीय व्यवस्थां बांलाक ज्या याये मफुत धकाः आलोचना जुयाच्वंगु हे इलय् प्रदेश सरकारतय्सं नं थःपिंसं ज्या याये मफुगु संकेत क्यना हःगु दु । प्रदेश सरकारतय्सं आः तक कुल बजेटया करिब ६ प्रतिशत जक पूँजीगत खर्च (विकास निर्माणय् याइगु खर्च) याःगु तथ्यांकतय्सं प्रदेश सरकारत नं विकास निर्माणया ज्याय् लिउने लाःगु संकेत पिहां वःगु खः ।
वंगु च्याला न्ह्यः देय्या न्हय्गुलिं प्रदेश सरकारतय्सं अतिकं उत्साहपूर्वक थःपिनि न्हापांगु बजेट सार्वजनिक याःगु खः । तर बजेट पिहां वःगु च्याला (८ महिना) या अवधि दुने फुक्क हे प्रदेश सरकारतय्सं ५–६ प्रतिशत जक विकास बजेट खर्च याःगुलिं थुमिसं नं ज्या याये मफुत धइगु संकेत पिहां वःगु खँ विज्ञतय्सं धयाहःगु दु ।
प्रदेश सरकारतय्सं याःगु विकास खर्च नं विकास निर्माणया ज्याय् याःगु मखुसें सरकारयात माःगु गाडी खरिद, कार्यालययात माःगु सामान खरिदय् अप्वः छ्यःगु खः । थ्व ल्याखं विकास निर्माणया ज्याय् ला खर्च जूगु हे मदु धाःसां जिउगु खँ नं धयाहःगु दु । संघीय सरकारं जक पूँजीगत खर्च याये मफयाच्वंगु खःसा वहे ल्वय् प्रदेश सरकारतय्त नं सरे जुया वंगु टिप्पणी नं याना हःगु दु ।
५ नम्बर प्रदेश सरकारं थनिं च्याला न्ह्यः २८ अर्ब तकाया बजेट प्रस्तुत याःगु खः । तर आः थुकिया ६ प्रतिशत जक विकास बजेट खर्च जूगु दु । प्रदेश सरकारतय्गु आर्थिक वर्ष आः प्यला जक ल्यं दनि । उकिं लक्ष्य कथंं विकास बजेट खर्च याये फइगु ला अवस्था हे मदु । तर प्रदेश सरकारतय्सं गुलि नं निर्माण परियोजनात शुरु याना तःगु खः, थ्व नं असारय् बजेट लिकाये मालीगु बाध्यात्मक कारणं यानाः हथासं ध्यबा खर्च यानाः बजेट सिधयेकीगु सम्भावना अप्वया वःगु खँ नं सूत्रं धाःगु दु ।
यदि प्रदेश सरकारतय्सं नं असारं बजेट सिधयेकेगु ल्याखं जक विकास बजेट खर्च याना जुल धाःसा विकास निर्माणया सन्दर्भय् थुपिं नं न्हू ज्या याइपिं मखुसें संघीय सरकारया ‘फोटोकपी’ जक जू वनीगु ख्याच्वः नं विज्ञतय्सं बिया हःगु दु । तर स्वयम् प्रदेश सरकारतय्सं धाःसा थथे जूगुया कारण इलय् माःगु कानून दयेकेगु ज्या मजूगु, कर्मचारी खटे याना महःगु तर्क न्ह्यःने तःगु दु ।
अथे हे गुलिखे विज्ञतय्सं प्रदेश सरकारतय्गु थ्व न्हापांगु बजेट जूगु कारणं अनुभवया कमी व व्यवहारिक समस्यातय्सं यानाः आशा याना कथं ज्या मजूगु स्वाभाविक जुइगु टिप्पणी नं याना हःगु दु ।
LEAVE YOUR COMMENTS