राष्ट्रपति बाघौया निंतिं

संसारय् छम्ह राष्ट्रपतिया छगू कार्यकाल न्यादँया निंतिं जुइ । यदि उम्ह राष्ट्रपति म्हं मफुत, दथुइ हे छुं कारणं राजीनामा बिल, मंत वा मेगु छुं नं अभियोग प्रमाणित मजुल धाःसा वयागु न्यादँया कार्यकाल पक्का । तर थ्व संसारय् छगू अज्याःगु नं देय् दु, गन मात्र १ घन्टाया दुने स्वम्ह राष्ट्रपति जूगु दु । उत्तर अमेरिकी देय् मेक्सिकोया नां मन्यंपिं धइपिं शायद हे जक दइ ।

अझ लिपांगु इलय् अमेरिकी राष्ट्रपति डोनाल्ड ट्रम्पं थःगु देय्लिसे स्वानाच्वंगु मेक्सिकोया सीमाय् पःखाः ग्वयेगु धइगु खँया कारणं थ्व देय्या चर्चा अप्वया च्वंगु दु । थ्व हे मेक्सिकोय् दकलय् याकनं याकनं राष्ट्रपति हिलाः विश्वय् छगू नमूना कायम याःगु दु । खँ सन् १९१३ फेब्रुअरी १३ या खः । थ्व कुन्हु तत्कालीन राष्ट्रपति मादेरोयात अनया सैनिक जनरल भिक्टोरियानो होएर्तां अपदस्थ यात ।

अले सैनिक योजनाकथं कानुनी संकट चिइकेगु ल्याखं तत्कालीन परराष्ट्रमन्त्री लास्कुरेनयात राष्ट्रपति दयेकल । वयां लगत्तै हे उपराष्ट्रपति व महान्यायाधिवक्तयात जेलय् क्वचिनाबिल । वयां लिपा लास्कुरेनं थःत राष्ट्रपति दयेकूम्ह सैन्य जनरल होएर्तायात गृहमन्त्री नियुक्त यासें तत्काल थम्हं राष्ट्रपति पदं राजीनामा बिल । लास्कुरेनया राजीनामा लिपा देय्या बागडोर जनरल हाएर्ताया ब्वहलय् वल ।

थुकथं मात्र १ घन्टाया दुने मेक्सिकोय् स्वम्ह राष्ट्रपति जुल । गुगु विश्वय् आतकया दुने दकलय् याकनं राष्ट्रपति हिउगु घटनाया रुपय् कायम जुल । अझ न्ह्यइपुगु खँ ला थ्व दु कि लास्कुरेन विश्वय् दकलय् म्हो ईया निंतिं राष्ट्रपति जूम्ह व्यक्तिकथं कायेगु याः । व मुक्क बाघौ (३० मिनेट)या निंतिं जक राष्ट्रपति जूगु खः ।