ने. सं. ११४४ कौलाथ्व तृतीया -

ख्वपया ज्याथःगु भाषिक संस्थां वार्षिकोत्सव हन

थिमि – ख्वप जिल्लाया हे दकलय् ज्याथगु भाषिक संस्था न्ह्यज्याः खलः, थिमिं थःगु न्यय्न्हय्क्वःगु वार्षिकोत्सव न्यायेकल । मध्यपुर थिमिया बालकुमारिइ साहित्यिक व थीथी सांस्कृतिक ज्याझ्वः यासें बुन्हि ज्याझ्वः हंगु खः । २०१८ सालय् तत्कालीन निरंकुश पंचायती शासन व्यवस्थाया इलय् गठन जूगु संस्थां भाषा, साहित्य, शिक्षा व सामाजिक ख्यलय् जनचेतना थनेगु ल्याखं थीथी ज्याझ्वः न्ह्याकूगु खः ।

ज्याझ्वलय् प्रदेश नं ३ या सांसद राजेन्द्रमान श्रेष्ठं स्थानीय तह व प्रदेशया दथुइ समन्वयया लिधंसाय् विकास निर्माणया ज्यायात तीव्रता बिया वनेमाःगु खँय् बः बियादिल । साहित्यकार त्रिरत्न शाक्यं मांभाय् न्हना वनीगु अवस्थाय् थ्यनाच्वंगु खँय् चिउताः प्वंकादिसें थःपिंसं नेवाः देय् दबूया विधान दयेकेगु झ्वलय् नीन्यागू जिल्ला चाःहिलागु व दक्वं जिल्लाय् मातृभाषा प्रयोग यायेगु सम्बन्धय् समस्या जुयाच्वंगु अनुभव न्यंकादीगु खः ।

लिपांगु इलय् नेवाः भाय् जक मखसे मेमेगु मातृभाषा ल्हाइपिनिगु ल्याः नं म्हो जुया वनाच्वंगु अवस्थाय् संविधानय् तकं मांभासं शिक्षा अनिवार्य व निःशुल्क यायेमाःगु विधेयक पारित जुइधुंकूगुलिं राज्यं हे मांभाय् संरक्षणया निंतिं पहल यायेमाःगु वय्कलं धयादिल ।

संस्थाया नायः सुशीला श्रेष्ठया सभापतित्वय् संस्थाया सचिव सुरेन्द्र किलंनः श्रेष्ठं लसकुस यानादीगु ज्याझ्वलय् मध्यपुर थिमि नगरपालिकाया प्रमुख मदनसुन्दर श्रेष्ठ, वरिष्ठ वाद्यगुरु श्रीगोपाल प्रजापति, साहित्यकार डा. योगेन्द्र प्रधान, वडाअध्यक्षपिं कुमार श्रेष्ठ, कृष्णकुमार प्रजापति, लगायत आपालं साहित्यकार, भाषासेवी, समाजसेवीपिनिगु उपस्थिति दुुगु खः। ज्याझ्वलय् चिनाखँ पाठ यायेगु, नाटक व प्रहसन न्ह्यब्वयेगु नापं थीथी सांस्कृतिक ज्याझ्वः नं न्ह्यब्वःगु खः ।