पत्रकार विक्रम शाक्य मंत

येँ महानगरपालिकां न्ह्याका वयाच्वंगु मेट्रो एफएमया संचारकःमि विक्रम शाक्य वंगु चान्हय् मंत । मेट्रो एफएम स्थापनाकालनिसें नेपालभाषा ज्याझ्वः न्ह्याकामिकथं आवद्ध जुयादीम्ह वय्कः नसाया ल्वचं पीडित जुयाच्वनादीम्ह खः ।

लिपांगु इलय् पिसाबया समस्या जुइवं बुधवाः जक वासः याकेत पाटन अस्पताल भर्ना जुया दीगु खःसा अनं वीर अस्पताल रिफर याःगु खः । वीर अस्पतालय् वासः याकेगु झ्वलय् वंगु चान्हय् मदुगु वय्कःया छेँजःपिंसं धाःगु द ।

मदुम्ह शाक्य नेपाल पत्रकार महासंघ मेट्रो एफएम प्रतिष्ठानया पुलांम्ह सभापतिलिसें नेवाः पत्रकार राष्ट्रिय दबू यल कचाया पुलांम्ह छ्याञ्जे नं खः । आपालं भाषिक व धार्मिक संघसंस्थाय् नं आवद्ध जुयाः क्रियाशील जुया च्वनादीम्ह वय्कःया जहान, काय छम्ह व म्ह्याय् छम्ह दु ।