सहकारी नियमनय् समस्या
येँ(नेपालभाषा टाइम्स)- येँ महानगर क्षेत्रय् संचालन जुयाच्वंगु सहकारी संस्थाय् नियमनया समस्या खने दया वःगु दु । महानगर क्षेत्र दुने संचालन जुयाच्वंगु सहकारी नियमनय् समस्या खने दुगु जक मखसे गुलिखे सहकारीत सम्पर्कय् तकं वयाच्वंगु मदु ।
येँ महानगरपालिका अन्तर्गतया सहकारी विभागयाकथं नियामकया सम्पर्कय् मवइगु व व हे वल धाःसां कानूनकथं बुझे यायेमाःगु विवरण हे बुझे मयाइगु सहकारी संस्थात आपालं दयाच्वंगु दु ।
महानगरपालिकायात कार्य क्षेत्र दयेकाः आतक दर्ता जुयाच्वंगु सहकारीया ल्याः जक १,९६९ गू दुगु विभागं जानकारी बिउगु दु । थुकीमध्ये स्वसः स्वयां अप्वः सहकारी संस्थात सम्पर्कय् वयाच्वंगु मदु । अथे हे बछि स्वयां अप्वः सहकारी संस्थां नियमकथं इलय् विवरण अद्यावधिक नं यानामच्वंगु विभागं न्ह्यथंगु दु ।
सहकारी ऐन व नियमावलीकथं प्रत्येक सहकारी संस्थां आर्थिक दँ क्वचाःगु खुलाया दुने सम्बन्धित सहकारी विभागय् साधारणसभा व कर चुक्ताया प्रमाणपत्रलिसें विवरण अद्यावधिक यायेमाः । तर विभागं बिउगु जानकारीकथं द्वःछि स्वयां अप्वः सहकारी संस्थां वंगु आर्थिक दँया विवरण आतक नं अद्यावधिक याःगु मदुनि ।
विभागया प्रमुख देवेन्द्र पोखरेलं वंगु आर्थिक दँ ०७७÷७८या विवरणसहित करिब न्हय्सः स्वयां अप्वः सहकारीं जक विवरण अद्यावधिक याःगु व असार मसान्त तकया दुने गुसःया हाराहारीइ थ्यंगु जानकारी बियादीगु दु ।
आर्थिक दँ ०७८÷७९या विवरण सहित अद्यवाधिक यायेगु मिति नं क्वचायेधुंकूगु दु । पुस मसान्ततकया दुने विवरण बुझे यायेमाःगु खःसा थ्यंमथ्यं न्यासःया ल्याखय् जक सहकारीं उकथंया विवरण बुझे याःगु दु ।
थ्व हे झ्वलय् सहकारी अद्यावधिक यायेत कोपोमिसय् आवद्धता व अपडेट अनिवार्य यायेमाःगु व्यवस्था सहकारी विभागं षःगु दु । थ्व हे कारणं विवरण सहितया अद्यवधिक याइपिनिगु ल्याः म्हो जूगु खयेमाः धकाः विभागं अनुमान याःगु दु ।
LEAVE YOUR COMMENTS