जगतसुन्दर ब्वनेकुथिया इन्का किन्डरगार्टेन
बबिता मानन्धर
हरेक मस्तय्त मांभासं शिक्षा बी दु धयागु खँ नेपाःया २०४७ सालया संविधानय् घोषणा जूगु खः । थुगु घोषणा लिपा नेपालभाषाय् नुगः क्वसाःपिं नेवाःत जानाः जगतसुन्दर ब्वनेकुथि नीस्वन । थुगु ब्वनेकुथिया छेँ धस्वाकेत नेवाःत न्ह्यज्यात । थुकियात सुथां लाकेत जापान हिकिभापाखें तःधंगु योगदान यात ।
जापान हिकिभाया ग्वाहालिं ब्वनेकुथिइया छेँ धस्वाकेगु जक मखु, ब्वनेकुथि सुथां लाक्क न्ह्याकेत माःगु सकतां कथंया ग्वाहालि नं यात । थौं ब्वनेकुथि नीच्यादँ दयेधुंकल । छुं न्हि लिपा नीगुदँय् क्यनी । म्हिगः स्वयाः थौं ब्वनेकुथिया स्वरुप पाये धुंकूगु दु । थौंतले जापान हिकिभां माःगु इलय् मांकथं ग्वाहालि याना वयाच्वंगु दु ।
जापान हिकिभाया नापनापं थौं जर्मनया इन्का वाउच पाखें नं ब्वनेकुथियात ग्वाहालि याना वयाच्वंगु दु । ब्वनेकुथिया किन्डरगार्टेन ब्लक न्हूकथं दयेकेगु ज्या इन्का पाखें जूगु दु । छुं दँ न्ह्यवनिसें इन्का किन्डरगार्टेनया नामं ब्वनेकुथिइ न्हू कथंया व्यवस्था नं जूगु दु ।
थुगु किन्डरगार्टेन ब्लकय् मस्तय्त पाय्छि जुइक मेच टेबलया व्यवस्था यानातःगु दु ।
मस्तय्सं थःगु सामान थम्हं बिचाः यायेमाः धयागु धारणां मस्तय्त ल्वयेक दराजया व्यवस्था यानातःगु दु । दराजय् मस्तय्गु नां च्वयातःगु दु । न्हियान्हिथं झ्यातुक सफू क्वबिया जुइ म्वायेक सफू तयेत नं थुगु दराज छ्यली ।मस्त द्यनेत व्यवस्थित ढंगं लासा लानाः द्यनेगु क्वथाया व्यवस्था नं यानातःगु दु ।
थन मस्तय्त ल्वयेक, मस्तय्गु जक सफू तयाः मस्तय् सफू धुकूया व्यवस्था नं यानातःगु दु । ब्वनेकुथि धयागु आखः ब्वंकेगु थाय् जक मखु । न्हिछि मस्त न्ह्यइपुकेत माःगु सकतां हलंज्वलं दु । थन आधुनिक न्ह्यवःसा दु । आखः स्यनेगु इलय् सफू पाखें जक ज्ञान बिइगु मखु, प्रोजेक्टर छ्यलाः भिजुअल क्लास नं न्ह्याकी ।
बाखं न्यंकेगु नं याइ । किपा च्वयेगु निसें ओरिगामि (Art and craft) नं स्यनी । मस्त न्ह्यइपुगु लकसय् ब्वलनेमाः धकाः हुलाप्याखं नं स्यनी । नेवाः भाय्, खस भाय्, अंग्रेजी भाय्या नापनापं जापानीज भाय्या म्येँय् हुलाप्याखं स्यनी । उलि जक मखु, दँय्दसं मस्तय्त हामापिं मुनाः न्ह्यइपुकेगु ज्याझ्वः नं न्ह्याकी ।
अझ युकेजी क्वचायेवं छगू तगिमय् छ्वयेत युकेजी क्वचायेके ज्याझ्वः नं जुइ । मस्तय् दथुइ दँय् छकः कासान्हि नं न्ह्याकी । थुगु दिनय् मस्त नापनापं हामापिंसं नं ब्वति काइ । मस्त धयापिं चा थें खः । गज्याःगु लकसय् ब्वलंकल, अथे हे जुइ । मस्तय्त नखःचखःया ज्ञान बीगु ज्या म्हो जुया वयाच्वंगु दु ।
तर थुगु ब्वनेकुथिइ मस्तय्त नखःचखःया ज्ञान बी । थीथी कथंया नखःचखः मस्तनाप हनी । मस्तय्त नखः कथंया नसा ज्वरे यानाः नकी । अझ मस्त स्वस्थ जुइमा धयागु मनंतुसें बिहीवाःपतिकं मस्तय्त फलफुल नकी । शुक्रवाःपतिकं टिफिन नकेगु व्यवस्था नं दु ।
थौंकन्हय् हरेक थासय् मस्तय्त बालमैत्री वातावरण दयेमाः ।
उकिं थन मस्तय्त ल्वःगु कथंया क्यबया व्यवस्था यानातःगु दु । थन थीथी कथंया स्वां नापनापं फलफूल नं पिनातःगु दु । नापं थन मस्तय्त ल्वःगु न्ह्यबःसा नं तयातःगु दु । थांै थाय्थासय् मस्तय्त चःबिया समस्या जुयाच्वंगु दु । तर थन मस्तय्त ल्वःगु मस्तय्त छिंगु चःबिया तकं व्यवस्था यानातःगु दु ।
मस्तय्त बांलाक बिचाः यायेमाः, उकिं थन अनुभवी गुरुमांपिं दु । थुगु किन्डरगार्टेन पाखें दँय्दसं इन्टर किन्डरगाडर्टेन Drawing Programm नं न्ह्याका वयाच्वंगु दु । थन नेपालभाषाया नापनापं अंग्रेजी भाय् व खस भाय् नं स्यनी । थुकिं यानाः थन नेवाः मस्त नापनापं गैर नेवाः मस्त नापं ब्वनाच्वंगु दु ।
LEAVE YOUR COMMENTS