लः त्वनाया फाइदा छु छु दु ?

थ्व खँ झी सकसिनं सिउ कि लः हे जीवन खः, अले लः विनाया जीवन सम्भव मदु । लखं झीगु प्याःचाः लंकीगु जक मखु, पाचनतन्त्रं निसें न्हयपुया विकासय् तकं महत्वपूर्ण भूमिका म्हिताच्वनी । लः मनूया जीवनया निंतिं बहुूल्य खः, अलेम चांनिसें हे झीसं थुकिया फाइदाया बारे न्यना वयाच्वनागु दु । न्ह्यागु नं ल्वचय् लखं रामवाणं थें ज्या याइ । लः छ्यलाबुला यक्व हे तरिकां प्राकृतिक अचारया रुपय् जुया वयाच्वंगु दु । म्हय् लः मगानाः जुइगु छ्यं स्याइगु व जँ स्याइगु ल्वचय् नं लखं हे फाइदा याइ, अले झीगु म्हयात ‘फ्रेश’ यानातइ । उकिं स्वस्थ जुयाच्वनेगु खःसा ईश्वरया थुगु देनपाखें झीसं फक्व फाइदा काये सयेकेमाः ।
प्वाः सफा यायेत ः लः त्वनेगु यातकि पाचनतन्त्र प्राकृतिक रुपं हे बांलानाच्वनी । सुथय् दनेवं छगू गिलास लः त्वनेगु यानाच्वन धाःसा प्वाः सफा जुयाच्वनी, लिसें थुकिं छितः कब्जियतया समस्या मजुइकातइ ।
बांलाःगु फिगरया निंतिं ः यदि छिं गाक्क लः त्वनेगु मयात धाःसा छिगु म्हया मेटाबोलिज्मया गति सुस्त जुइ । थुकिया अर्थ खः दाःया अवशोषणया निंतिं लः मदयेक मगाः । न्हियान्हिथं छुं मखुसां च्यागू गिलास लः त्वनादिसँ । थुकिं छिगु फिगर बांलानाच्वनी ।
छ्यं स्याःसा ः लगातार छ्यं स्यानाच्वनीगु पाखें बचे जुइगु खःसा छता उपाय वासः नयेगु खःसा मेगु उपाय छुं छुं गिलास लः त्वनाबीगु । थ्व छुं अजू चायापुगु खँ मखु । छाय्कि ९० प्रतिशत छ्यं स्याइगु कारण म्हय् लः मगानाः खः ।
छ्यंगू बांलाकातयेत ः छिं यक्वकथंया एन्टिएजिंग क्रिम छ्यानादीगु दयेमाः । आः छक्वः लः गाक्क त्वना स्वयादिसँ । थुकिं छ्यंगूया कोषयात हानं जायेकाबी । अले छ्यंगूयात प्याकाः इलास्टिसिटि नं बियाबी । ल्याय्म्ह ल्यासे खनेदयेकेगु ःपुगु उपाय नालादिसँ, मतलब लः गाक्क त्वनादिसँ ।
त्यानु लंकेत ः गबलें नं छितः त्यानुगु महसुस जुल धाःसा लखं ख्वाः सिलादिसँ । अथे यायेबलय् छिं हानं फ्रेश जूगु वाःचायेकादी । म्हय् लः मगात कि पाचनतन्त्रं बांलाक ज्या याइमखु, गुकिं यानाः छिं याकनं त्यानु चायावइ ।
सुथय् खालि प्वाथय् लः त्वनेगुया झिता फाइदा ः
न्हिं न्हिं सुथय् खालि प्वाथय् प्यंगू गिलास लः त्वन धाःसा छितः यक्व हे ल्वय्पाखें रक्षा यानातइ । थ्व खँ वैज्ञानिक रिसर्चं नं प्रमाणित जुइधुंकूगु दु । आः थन खालि प्वाथय् लः त्वनेगुया झिता फाइदा न्ह्यथनाच्वना –
१) विषालु तत्व पितछ्वइ ः प्रशस्त मात्राय् लः त्वनेगु यानाच्वन धाःसा म्हय् दुगु हानिकारक व विषालु तत्व चःति व च्वपाखें म्हं पिहां वनी । थुकिं यानाः थीथी विषाणुपाखें बचे जुइ, अले छुं नं ल्वय् जुइमखु । सुथसिया इलय् खालि प्वाथय् लः त्वनेगु यानाच्वनकि म्हया दुने बांलाक सफा जुइ ।
२) प्वाःया समस्या ः सुथय् दनाः खालि प्वाथय् लः त्वन धाःसा प्वाःया दक्वं समस्या ज्यनावनी । थुकिं यानाः कब्जियत जुइमखु, आतापुतिइ थानाच्वंगु खि पिहां वयेत अःपुइ, गुकिं यानाः प्वाः छगलं सफा जुइ, अले नयेगु रुचि नं अप्वयावइ ।
३) तनावपाखें मुक्ति ः सुथय् खालि प्वाथय् व न्हिछिं लः त्वनेगु यानांतुं च्वन धाःसा तनाव जुइमखु । मानसिक समस्या नं मदयावनी । द्यनाः दनावयेबलय् दिमाग शान्त जुयाच्वनी । थज्याःबलय् लः त्वनाबिलकि दिमागयात अक्सिजन बियाः फ्रेश यानातइ, गुकिं यानाः दिमाग सक्रिय जुयाच्वनी ।
४) तौल क्वकायेगु खःसा ः सुथसिया इलय् ख्वाउँ लः त्वनेगु यातकि मेटाबोलिज्म २४ प्रतिशत तक अप्वइ, गुकिं यानाः तौल याउँक हे कम जुइ । अथेहे क्वाःलः त्वनेगु यात धाःसां नं अप्वःगु दाः कम जुइ, अले छिगु म्हया तौल कम जुइ ।
५) च्वया समस्या ः सुथय् खालि प्वाथय् त्वनागु लखं चछिया दुने दयावःगु हानिकारक तत्वयात छक्वलं हे च्वया माध्यमं पित छ्वयेगु ज्या याइ । थुकिया लिसें इलय् इलय् प्रशस्त मात्राय् लः त्वनेगु यानाच्वन कि च्व फायेबलय् हिइसे च्वनीगु, युरिन इन्फेक्सन व मेमेगु च्वया समस्या मदयावनी ।
६) छ्यंगू बांलाइ ः खालि प्वाथय् लः त्वनेगु यानाच्वनकि तन्तुयात अक्सिजन चूलाइ, अले व सक्रिय जुयाच्वनी, गुकिं यानाः छ्यंगू स्वस्थ जुय । थुकिया लिसेलिसें चःतिपाखें हानिकारक तत्व म्हं पिहां वनकि छ्यंगू दुने सफा जुइ, अले उकी म्वाइश्चर दयाच्वनी, गुकिं यानाः छ्यंगू स्वस्थ व चमकदार जुइ ।
७) म्हया तापक्रम ः खालि प्वाथय् लः त्वनकि न्हिया सुरुवातं निसें हे छिगु म्हया तापक्रम नियन्त्रणय् दयाच्वनी, गुकिं चिचिधंगु ल्वय्पाखें म्ह सुरक्षित जुयाच्वनी ।
८) ल्वय्लिसे ल्वायेगु क्षमताः लखं म्हय् म्वाःमदुगु तत्वयात ल्यंकातइमखु । अले म्हया दक्वं अंगयात स्वस्थ यानातइ । थुकिं म्हया ल्वय्लिसे ल्वायेगु क्षमता अप्वयेकाबी ।
९) न्हूगु तन्तु ः लखं हिइ हानिकारक तत्व ल्वाकज्याके बीमखु, अले उकिया शुद्धिकरणय् ग्वाहालि याइ, गुकिं यानाः न्हूगु तन्तु व मांसपेशी दयावयेगु प्रक्रिया न्ह्यानावनी ।
१०) म्वाइश्चर दयेकातइ ः बांलाक ज्या यायेत म्हया थीथी अंगय् म्वाइश्चर दयाच्वनेगु एकदम आवश्यक जुइ, गुकियात दयेकातयेगु ज्या लखं यानाच्वंगु दइ । अथे जुयाः न्हिया सुरुवातय् हे खालि प्वाथय् लः त्वनेगु बेस जुइ । अथे जुल धाःसा न्हिछि हे बांलाक ज्या यानाच्वनेफइ ।
द्यःने न्ह्यः लः त्वनाया फाइदा
खालि प्वाथय् लः त्वनाया फाइदा बारे सीकेधुंकाः आः छक्वः हानं द्यने न्ह्यः लः त्वाया फाइदा बारे नं सीके –
१) दाः कम याइ ः थौंकन्हय्या अति व्यस्त जीवनशैलीइ अनियमित नये त्वनेगुया कारणं म्हय् दाः खाइगु समस्या अप्वया वयाच्वंगु दु । लिसें गुपिं मनूत अफिसया ज्याय् लिमलाकाः जुइ, उमित थःपिनि म्हय् दाः कम याये तसकं थाकुइ । थज्याःबलय् लः दकलय् बांलाःगु उपाय खः । द्यने न्ह्यः लः त्वनेगु यात धाःसा म्हय्च्वंगु क्यालेरीयात प्राकृतिक तरिकां हे कम यायेत ग्वाहालि जुइ ।
२) रंग बांलाइ ः यदि छिं सुं सेलिब्रिटीया डाइट स्वयेगु खःसा छिं उकी यक्व मात्राय् लः त्वनेगु बानी नं खंकेफइ । धाथें खः न्ह्याम्ह सेलिब्रिटीं नं न्हिं छुं मखुसां १० निसें १२ गिलास स्वयां अप्वः लः त्वनाच्वंगु दयाच्वनी । थुकिं यानाः उमिगु ख्वाः गुलाफस्वां थें बांलानाच्वनी । यदि छिं नं थज्याःगु हे चाहना यानादियागु दुसा द्यने न्ह्यः लः त्वनेगु यानादिसँ ।
३) क्वातुक न्ह्यः वइ ः ज्याया व्यवस्तता व अनेक कारणं जुइगु तनावं यानाः थौंकन्हय् मनूतय्त न्ह्यः मवइगु समस्या जुइगु धयागु नं साधारण खँ थें जुइधुंकल । न्हापा न्हापा जूसां यक्व उमेर दयेधुंकूपिं मनूतय्त जक थ्व समस्या जुइगु खः । थौंकन्हय् ला ल्यासे ल्याय्म्हतय्त तक थ्व समस्या जुया वयाच्वंगु दु । द्यने न्ह्यः लः त्वन धाःसा हार्मोन्स व एनर्जी लेभल नितां ब्यालेन्सय् दयाच्वनी । मांसपेशी व जोर्नीइ नं आराम दइ । थुकिं यानाः न्ह्यः क्वातुक वइ ।
४) तनावपाखें शान्ति ः यछि छि तनावं जाःगु जिन्दगी हने मालाच्वंगु दुसा लः यक्व त्वनेगु थुकिया विकल्प खः । बहनी द्यने न्ह्यः सुनां लः त्वनेगु याइ, वया न्ह्यः क्वातुक वइ, छाय्कि लखं तनाव कम याइ । अथे जूगुलिं स्ट्रेस फ्री जुइत द्यने न्ह्यः अवश्य लः त्वनेगु यानादिसँ ।