विषालु तरकारी विरुद्ध प्रदर्शन

येँ – सरकारं भारतपाखें आयात याइगु तरकारी व फलफुलय् विषादी दु मदु जाँच हे मयासे दुकाये जिउ धकाः याःगु निर्णयया विरोधय् नेपाली कांग्रेसया भातृ संगठन नेवि संघं सतकय् विरोध प्रदर्शन याःगु दु । नेविसंघया पुलांम्ह महामन्त्री कुन्दन काफ्ले, नेता सुशील भट्ट लगायतया नेतृत्वय् येँय् थ्व प्रदर्शन जूगु खः ।

प्रदर्शनमार्गस्थित बाल्मिकी क्याम्पसं न्ह्याःगु विरोध ¥याली पुतलीसतकय् थ्यंकाः क्वचाःगु खः । नेवि संघया विद्यार्थीतय्सं म्हय् लोका, गोलभेडा, भान्ता, तुसि आदि थेंज्याःगु तरकारीया माला दयेकाः क्वखानाः सरकारी निर्णय विरुद्ध उगु प्रदर्शन याःगु खः । सरकारं विषालु तरकारी झिके यानाः जनतायात विष नकेगु ज्या यानाच्वंगु द्वपं उमिसं बिउगु खः ।

नेविसंघ नेता भट्टं सरकारं भारतीय विषालु तरकारी व फलफुल जाँच मयासे नेपाल आयात याके बियाः जनस्वास्थ्यय् खेलवाड याःगु द्वपं बियादिल । सरकारं असार १९ गते मन्त्रिपरिषद्या बैठकं भारतं नेपालय् आयात जुया वयाच्वंगु तरकारी व फलफूलय् छ्यलातःगु विषादी परीक्षण मयायेगु निर्णय यायेवं सत्तारुढ दलया नेतांनिसें कयाः विपक्षीतय्सं कडा विरोध याना हःगु खः ।

थ्व स्वयां न्ह्यः सरकारं असार २ गते निकासी पैठारी सम्बन्धी आदेश राजपत्र पिथंसें नेपालय आयात जुइगु भारतीय तरकारी व फलफूल सीमा नाकाय् विषादी परीक्षण यानाः जक दुकायेगु खँ न्ह्यथंगु खः । आः वयाः तत्कालया निंतिं विषादी परीक्षण यायेगु निंतिं नेपालय् माक्व प्रयोगशाला व जनशक्ति मदुगुलिं खुलाया निंतिं परीक्षण मयायेगु धकाः हानं मेगु निर्णय याःगु खः ।

कृषि तथा पशुपंक्षी विकास मन्त्री चक्रपाणी खनालं भारत लगायत स्वंगू देशं आयात जुइगु तरकारी व फलफूल विषादी परीक्षणया ज्या न्ह्याकेत दछि ई काइगु खँ कनादीगु दु । राष्ट्रिय सभाय् आइतवाः न्ववासें वय्कलं थ्व खँ कनादीगु खः । नेपालय् विषादी परीक्षण यायेगु क्षमता मदुगु खँ वय्कलं कनादीगु खः ।