करुणाकर सिरपाः मदनसेन वज्राचार्ययात

यल –  लोक साहित्य परिषद्पाखें लोक साहित्यविद् मदुम्ह करुणाकर वैद्यया लुमन्तिइ नीस्वनातःगु करुणाकर सिरपाः लोक साहित्यया अध्यता भाजु मदनसेन वज्राचार्ययात लःल्हात । परिषद्या नायः प्रा. प्रेमशान्ति तुलाधरया सभापतित्वय् जूगु ज्याझ्वलय् मूपाहांलिसें परिषद्या संरक्षक वाङ्मय शताब्दी पुरुष सत्यमोहन जोशीं उगु सिरपाः लःल्हानादीगु खः ।

मूपाहां जोशीं सम्मानित व्यक्तित्व वज्राचार्ययात हनापौ लःल्हानादीगु खःसा दिवाकर वैद्यं पुरस्कार वापतया स्वीद्वः तका दां लःल्हानादीगु खः । उगु हे ज्याझ्वलय् मदुम्ह पन्नाप्रसाद जोशी (बैद्यबाः) या संक्षिप्त नेपालभाषा शब्दकोषया निगूगु संस्करण मूपाहां जोशीं सार्वजनिक यानादीगु खः ।

उगु शब्दकोषया निगूगु संस्करण पिथनेत आर्थिक रुपं ग्वाहालि यानादीपिं जोशीया छेँजःपिं शील मञ्जु जोशी श्रेष्ठ व पाटन संयुक्त क्याम्पसया सह प्रमुख मञ्जुश्री जोशी श्रेष्ठलिसें मेरिना सिख्राकार व देवकी श्रेष्ठयात नं मूपाहां जोशीं सुभाय् पौ लःल्हानादीगु खः ।

नेपालभाषा केन्द्रीय विभागया पुलांम्ह प्रमुख तुलसीलाल सिंहं लसकुस यानादीगु ज्याझ्वलय् धर्मकृष्ण श्रेष्ठं सुभाय् देछानादीगु खः ।
ज्याझ्वलय् सिरपाःया दातापिं दिवाकर वैद्य, जयाकर वैद्य, शोभाकर वैद्य, केन्द्रीय विभागया पुलांम्ह प्रमुख प्रा. डा. चन्द्रमान वज्राचार्य, डा. पुष्पराज राजकर्णिकार, जुजुकाजी रंजित लगायत आपालं विशिष्ट व्यक्तित्वपिनिगु उपस्थिति दुगु खः ।

 

सम्बन्धित बुखँ

LEAVE YOUR COMMENTS