द्वाल्खाया प्रधानतय् कुलछेँ शिलान्यास

येँ(नेपालभाषा टाइम्स)- द्वाल्खाया प्रधान खलःतय् कुल छेँ पुनःनिर्माणया निंतिं शिलान्यास याःगु दु । नेवाःतय् ऐतिहासिक व प्राचीन सहर द्वाल्खाया नक्छे प्रधानतय् कुल छेँ पुनःनिर्माणया निंतिं वंगु सिथिनखःया दिंकुन्हु शिलान्यास याःगु खः ।

२०७२ सालया गोरखा केन्द्रविन्दु जुयाः ब्वःगु भुखाचं द्वाल्खाय् नं आपालं छेँ क्षति याःगु खःसा नक्छे प्रधानतय् छेँ नं क्षति जूगु खः । नक्छे प्रधान खलःया सकलें मुनाः मुँज्यां याःगु निर्णयकथं कुल छेँ पुनःनिर्माण यायेत्यनागु निर्माण समितिया नायः ई. नहेन्द्र प्रधानं कनादिल । थःपिनिगु कुल छेँ पुनःनिर्माण यायेत थःपनिगु कुल परिवार, थःथिति, म्ह्यामस्त भिनामस्तय्तकं ग्वाहालि यायेत तयार जूगु वय्कलं कनादिल ।

कुल छेँ शिलान्यासया इलय् नक्छे प्रधान परिवारया आपालं उपस्थित जूगु खः । उगु इलय् थकालि यज्ञबहादुर प्रधान, राष्ट्रभूषण प्रधान, नहेन्द्र प्रधान, मुक्तिनारायण प्रधान, उपेन्द्र प्रधान, अमरकुमार प्रधान, शरणकुमार प्रधान, माधवनारायण प्रधान, नवराज प्रधान, इन्द्र प्रधान लगायतया दाजुकिजापिंलिसें भौमचा शशि प्रधानया नं उपस्थिति दुगु खः ।