फोनिज बागमती प्रदेशया अपांगता सवालय् स्वन्हुया तालिम क्वचाल

येँ (नेपालभाषा टाइम्स)- नेपाल आदिवासी जनजाती पत्रकार महासंघ (फोनिज) नेवाः ताम्सालिङ बागमती प्रदेशया ग्वसालय् जूगु अपांगता सवालय् स्वन्हुयंकं पत्रकारिता तालिम क्वचाःगु दु ।

सामाजिक विकास मन्त्रालय बागमती प्रदेशया आर्थिक ग्वाहालि व फोनिज बागमती प्रदेशया ग्वसालय् बागमती प्रदेश दुनेया भिंmस्वंगू जिल्लाय् अपांगसम्बन्धी कलम न्ह्याकीपिं पत्रकार व अपांग जूपिं पत्रकारपिंत तालिम बिउगु खः । रामेछाप मन्थली संचालन जूगु उगु तालिमय् मुक्कं ३० म्ह प्रशिक्षार्थीपिंसं ब्वति काःगु खः ।

तालिमया समापन ज्याझ्वलय् नेपाल आदिवासी जनजाति पत्रकार महासंघ(फोनिज)या संघीय अध्यक्ष गर्जुधन राईं सहभागीपिंत बधाई बिसें सयेकागु ज्ञान व्यवसायय् छ्यलाः अब्बल खने दयेकेत इनाप यानादिल । आदिवासी जनजाति अझं मूलधारय् दुहां वने मफुनिगु खँ वय्कलं धयादिल । ‘झीपिं यक्व हे हिसाबं लिउने लानाच्वंगु दु । नेपालया सीमान्तकृत व लोपोन्मुख जातियात मूलधारय् हयेत फोनिजकर्मिपिं सीमान्तकृत व लोपन्मुख जातिया थाय् थ्यंकेमाःगु दु ।’

अध्यक्ष राईं नेपाल पत्रकार महासंघं तथ्ययात न्हुयाः ज्या याःगु द्वपं बिउगु दु । सत्यतथ्य आधार दयेक दयेकं नं सत्यनारायण बहादुर श्रेष्ठयात संस्थापक घोषणा यायेत आनाकानी यानाच्वंगु लिसें उगु विषयय् याकनं छानबिन जुइमाःगु खँ वय्कलं धयादिल ।

फोनिज बागमती प्रदेशया इन्चार्ज पेमा लामां ‘अपांगता जूपिं संचारकर्मिया विषयय् झीसं फरक कथं बिचाः यायेमाः धयादिसें  सहभागिता जक तःधंगु खँ मखु सयेकागु ज्ञान व्यवहारय् छ्यलेगु तःधं खँ खः’ धयादिल ।

फोनिजया पुलांम्ह उपाध्यक्ष नापं प्रशिक्षक कुमार यात्रीं रामेछाप जिल्ला आदिवासी जनजातिया बाहुल्य दुगु जिल्ला जूगु ल्याखं नं थुगु जिल्लाय् तालिम बियागु खँ न्ह्यथनादिल । अथे हे नेपाल पत्रकार महासंघ बागमती प्रदेशया कोषाध्यक्ष रमेश ढुंगेलं अपांगता जूपिनिगु क्षेत्रय् जक मखसे मेगु क्षेत्रयात नं कयाः थुगु तालिम बिउगु खः धयादिल । पुलांगु व न्हूगु फ्युजन यानाः न्ह्यःने न्ह्याःवंसा सफलता चूलाइगु वय्कःया धारणा दु ।

नेपाल आदिवासी जनजाति पत्रकार महासंघ (फोनिज) बागमती प्रदेशया अध्यक्ष युवराज श्रेष्ठं आदिवासी जनजाति समुदायया विषयवस्तु उजागर यायेत तकं सीप प्रदान जूगु विश्वास कयागु दु धयादिल । ज्याझ्वः रामेछाप उपाध्यक्ष कैलाश खत्री, फोनिज रामेछापया अध्यक्ष कुमार श्रेष्ठ, प्रशिक्षार्थी कुसुम गुरुङपिंसं थःथःपिनि नुगः खँ तयादीगु खः ।

सम्बन्धित बुखँ

LEAVE YOUR COMMENTS