जापानीतय् स्वां प्रेम
चन्द्रमान महर्जन
जापान
स्वां मयःपिं धयापिं मनूत शायद हे जक दु जुइ । उकिसनं जापानीत ला स्वां धालकि भुतुक्क हे जुइपिं । थःगु छेँ चिखा जूसां चिचिग्वःगु गमला तयाः नं स्वां पिनातइ । जापानीत स्वां ह्वःगु स्वयेगु निंतिं देय्या थीथी थाय् चाःहिला जुइ । उकिं यानाः आन्तरिक पर्यटनय् नं तःधंगु ग्वाहालि यानाच्वंगु दु ।
उपिं तसकं भिंपिं व इमान्दार नं जुइगुलिं यानाः ततःधंगु स्वांया क्यब नं तसकं सफा व सुन्दर जुयाच्वनी । उपिं लाःलाःथाय् फोहर मयाइपिं, वनेमजिउ धाःथाय् मवनीपिं जूगुलिं थज्याःगु थाय् सफा खने दयाच्वनीगु खः । जापानया थीथी ततःधंगु क्यबय् थीथी ताःजिया स्वां ह्वयेकी ।
थज्याःगु स्वां अप्वः थें चिकुलाया अन्त्यपाखे ह्वयेगु सुरु जुइसा गर्मी क्वचायेवं स्वां नं सुकू गनावनी । जापानय् ह्वयेकीगु तःताजिया स्वां मध्ये दकलय् अप्वः लोकंह्वाःगु स्वां ‘साकुरा’ खः । छाय्धाःसां थ्व जापानया राष्ट्रिय स्वां नं खः । थ्व स्वां स्वयेत विदेशय् तकं पर्यटकत वयेगु याइ ।
थ्व स्वां ह्वःगु स्वयेगु निंतिं दँय्दसं अप्वः थें जापानीत देय् थीथी थासय् चाःहिउवनेगु याइ । साकुराया सिमाक्वय् च्वनाः साक्क नसाज्वलं ज्वरे यानाः पासापिं, थःथितिपिं लिसे च्वनाः न्ह्याइपुकी । थथे पिकनिक न्यायेकेगुयात उमिसं ‘हानामी’ धाइ । ‘हाना’ धाःगु स्वां व ‘मी’ धाःगु स्वयेगु खः ।
साकुराया स्वां ह्वयेगु सुरु जूलिसे मेमेगु स्वां नं ह्वयेगु सुरु जुइ । गथेकि साकुरा धुंकाः अप्रिल महिनाया अन्त्य व मे महिनाया न्हापांगु वाःपाखे टुलिप (Tulips), अप्रिलया मध्ये व मेया मध्य तक सिवासाकुरा (Pink moss), अप्रिलया अन्त्य व मेया सुरुवात पाखे फुजिइ (Wisteria), मेया मध्यपाखे निसें गुलाफ (Rose), जुनया मध्य निसें जुलाइया मध्य तक आजीसाइ (Hydrangea), जुलाइया सुरुवात निसें अगस्तया मध्ये तक हिमावारी (Sunflow), अथेहे अगस्तया न्हापांगु वाःपाखे कोक्काइदोय् लेवेन्दर, सेप्टेम्बरया मध्य निसें डिसेम्बरया सुरुवात तक देरौ मरी कोयो (Sutumn colors) धयागु सिमाया हः ह्याँउसे च्वनीगु (Mapple Plant) सुरु जुइ ।
LEAVE YOUR COMMENTS