बलिउडय् फिफ्टि प्लस हिरो

न्ह्यागु हे पेशाय् थःजुइमा उमेरया छगू हद पुलकि रिटायर जुइगु चलन दु, तर फिल्मय् एक्टिंग याइपिं स्टारतय् कलाकारिताया उमेर दइमखु धाइ । कलाकार धइपिं स्वकुमिया नुगः त्याकेफतले स्टार जुया च्वनेफु । तापाक मवने । भारतय् जक छक्वः स्वये ।

अन बलिउडय् न्हय्खुदँ क्यंम्ह अमिताभ बच्चन आः तक नं छम्ह स्टारया रुपय् लोकंह्वाना च्वंगु दनिसा साउथ इण्डियाया तामिल फिल्मया हिरो रजनीकान्त नं ७० दँया वैंश पुले धुंकूम्ह हिरो खः । बलिउड धकाः धयातःगु हिन्दी फिल्मयात स्वयेगु खःसा हिरो जुयाः म्हितीपिनिगु निंतिं न्यय्दँया उमेर धइगु छुं हे मखुथें जुयाच्वंगु दु ।

बलिउडया स्वम्ह खान सुपरस्टारया रुपय् नांजाःपिं शाहरूख खान, आमिर खान व सलमान खान न्यय्दँ पुले धुंकूपिं हिरोत खः । अले आःतक नं उपिं स्वम्हं हिरोतय्गु फिल्म वल कि हलय् स्वःवइपिनि भीड उलि हे खनेदयाच्वंगु दु । थगुने नगुने तक सलमान खानया सुल्तान, टाइगर जिन्दा है अले आमिर खानया दंगल तसकं हे लोकंह्वाःगु फिल्म खः ।

थुगुसी वयाः धाःसा थुपिं स्वम्हं खान हिरोतय्गु फिल्मं लाय् साले मफुत । लाय् साले मफुसां उमिगु फिल्मं याःगु कमाइ स्वयेगु खःसा मेमेगु हिट फिल्मं याःगु फिल्मं सिबें अप्वं दां कमे यानाः क्यन । स्वम्हेसिया हे फिल्मं सछि करोड दां याउँक हे कमे यानाक्यन । हिन्दी फिल्मया ख्यलय् न्यय्दँ पुले धुंकाः नं हिरो जुयाच्वंपिं स्वम्ह खान जक मखु ।

स्वम्ह खानया फिल्मं लाय् साले मफइगु इलय् नं बांलाक हे दां कमे यानाः क्यनाच्वंपिं निम्ह हिरो धइपिं अक्षय कुमार व अजय देवगन खः । थुपिं निम्हं हिरोत नं न्यय्दँया लुखाखरुइ लानाच्वंपिं हिरोत खः । अक्षय कुमारया गोल्ड, रुस्तम, ट्वाइलेट ः एक प्रेमकथा, पाय्डमाय्न थेंज्याःगु फिल्म थ्व दँबदँ दुने हिट जूगु फिल्मत खःसा आः वयागु केशरी नांयागु फिल्मप्रति नं आपाःसिनं आसाकुति मिखा ब्वयाच्वंगु दु ।

अथे हे अजय देवगनया थगुने रेड नांयागु फिल्मं स्वकुमिया नुगः त्याकेत ताःलातसा थुगुसी वयागु टोटल धमाल नांयागु फिल्मं नं स्वकुमिया नुगः त्याकां पार याइ धइगु दावी याना वयाच्वंगु दु । थ्व फिल्मय् मेम्ह छम्ह नं उमेर वने धुंकूम्ह स्टारया मेन रोल दु । थुकी मेनरोल म्हिताच्वंम्ह मेम्ह फिफ्टि प्लस हिरो धइम्ह अनिल कपुर खः ।

हिन्दी फिल्मया ख्यलय् न्यय्दँ पुले धुंकाः नं हिरो जुयाच्वंपिं स्वम्ह खान जक मखु । स्वम्ह खानया फिल्मं लाय् साले मफइगु इलय् नं बांलाक हे दां कमे यानाः क्यनाच्वंपिं निम्ह हिरो धइपिं अक्षय कुमार व अजय देवगन खः ।

गुलिखे फिफ्टि प्लस स्टारतय्सं बलिउडय् रोमान्टिक रोल मयासे थःगु उमेरयात ल्वःकथंया रोल म्हितेगु नं यानाच्वंगु दु । उमिसं म्हितीगु अज्याःगु रोल फिल्मया मेन रोल जुयाच्वनी । दंगल फिल्मय् आमिर खानं म्हितूगु रोल अज्याःगु हे खःसा अनिल कपुरं टोटल धमाल फिल्मय् म्हिताच्वंगु रोल नं अज्याःगु हे छगू मेन रोल खः धइगु चर्चा दु ।

तर गब्लें गब्लें अमिताभ बच्चन थेंज्याःम्ह हिरोतकं थःगु उमेरयात ल्वःकथंया हे रोमान्टिक एंगल दुगु फिल्म नं म्हितूगु खँ थनथाय् चर्चा यायेबहजू । बलिउडया मेगा स्टार धयातःम्ह अमिताभ बच्चनं ‘चीनि कम’ नांयागु फिल्मय् तब्बुलिसे अज्याःगु हे रोल म्हितलसा ‘निःशब्द’ नांयागु फिल्मय् ला थः सिबें न्यय्दँ क्वकालिम्ह हिरोइन जिया खानलिसे तकं रोमान्टिक एंगल दुगु फिल्म म्हितूगु दु ।

अमिताभ बच्चनं जक मखु भारतया हे न्हापांम्ह सुपरस्टार धकाः धयातःम्ह राजेश खन्नां नं थः सिक्स्टी प्लसया उमेरय् ‘वफा’ नांयागु फिल्मय् थःसिबें पीदँ–पीन्यादँ क्वकालिम्ह लैला नांयाम्ह हिरोइनलिसे रोमान्टिक एंगल दुगु फिल्म म्हितल । खय्त ला राजेश खन्ना, अमिताभ बच्चन व जितेन्द्र धइपिं नं फिफ्टि प्लसया उमेरय् तक हिरो हे जुयाः फिल्म म्हिताच्वंपिं खः ।

राजेश खन्नां थःगु फोर्टी प्लस निसें फिफ्टि प्लसया उमेरय् पद्मीनि कोल्हापुरे थेंज्याःम्ह नच्चाम्ह हिरोइनलिसे छगू–निगू जक मखसे सौतन, बेवफाई, नयाँ कदम व इन्साफ मैं करुंगा थेंज्याःगु फिल्म म्हितलसा टिना मुनिमलिसे नं राजेश खन्नां सौतन, फिफ्टिी फिफ्टिी, अधिकार नापं यानाः बागू दर्जनसिबें अप्वः फिल्म म्हितल ।

राजेश खन्नासिबें उमेरय् यक्वः हे क्वकालिम्ह टिना मुनिमयात फिल्मय् हःम्ह धइम्ह देव आनन्द खः । देश परदेश नांयागु फिल्मय् देव आनन्दया अपोजिट हिरोइन जुयाः म्हितूगु इलय् टिना मुनिम धइम्ह देव आनन्दसिबें ख्वीदँसिबें अप्वः क्वकालिम्ह खः । विशेष यानाः बलिउडय् हिरो न्ह्याक्व हे उमेर दःसां पाइमखु तर हिरोइन धाःसा क्वकालिम्ह व नच्चाम्ह हे जुया वयाच्वंगु ताः दये धुंकल ।

खय्त ला थौंकन्हय् वयाः हिन्दी फिल्यमा बाखं न्ह्यब्वयेगु शैली यक्व हे पानावये धुंकूगु दु । थगुने लोकंह्वाःगु फिल्मत स्वयेबलय् थ्व याउँक हे खनेदु । थगुने ‘स्त्री’ फिल्मय् श्रद्धा कपुर व ‘शादी में जरुर आना’ फिल्मय् कीर्ति खरबण्डालिसे म्हितूम्ह हिरो राजकुमार रावया व हिरोइन दथुइ उमेरया उलि ग्याप मदु ।

‘सुई धागा’ फिल्मया बरुण धवन व हिरोइन अनुष्का शर्मा, अन्धाधुन फिल्मया आयुष्मान खुराना व राधिका आप्टे अले धडक फिल्मया हिरोइन जान्हवी कपुर व हिरो ईशान खट्टरया दथुइ नं अज्याःगु ग्याप खनेमदु । मखु धइगु खःसा थज्याःगु उमेरया ग्याप ला बलिउडया पुलांगु हे चलन खः ।

आपाः याना फिफ्टी प्लसतकया हिरो धइगु बलिउडय् सामान्य हे खः धायेमाः, तर देव आनन्द छम्ह धाःसा फिफ्टिी सिक्स्टीजक मखसे सेभेन्टि–ऐटी प्लसतक नं हिरो जुयाः म्हिता च्वंम्ह हिरो खः । विशेष यानाः हिरोत सिक्स्टी प्लस जुल कि फिल्मया मेन लिड एक्टर जुयाः म्हितेगु नं याइ ।

गथेकि राजकुमार नांयाम्ह हिरोनं लिपा वनाः बुलन्दि, सौदागर थेंज्याःगु फिल्मय् मेजर रोल नं म्हितल तर थथे उमेर अनुसारया रोल म्हिताच्वंगु इलय् नं राजकुमारं कर्मयोगी नांयागु छगू फिल्मय् उगु जमानाया हिट हिरोइन रेखा लिसे रोमान्टिक एंगल दुुगु रोलनाप ल्याय्म्ह पात्र जुयाः म्हितलसा माला सिन्हालिसे बुराम्ह पात्र जुयाः नं म्हितल ।

फिफ्टिी प्लसया उमेरतक पुलावने धुंकाः दिलिप कुमारं बैराग नांयागु छगू फिल्मय् थःहे अबु अले निम्ह काय् जुयाः ट्रिपल रोल तकं म्हितलसा थःत बुरा जुइगु ल्वइकि ल्याय्म्ह जुइगु ल्वइ धकाः जाँचे यानास्वल । न्हापा उमेरया छगू ई पार जुइधुंकाः यानिकि फिफ्टी प्लस जुल की हिरोतय्सं थथे अबु नं थःहे काय् नं थः हे जुयाः म्हितेगु नं चलन चले जूगु खः ।

जितेन्द्रं फर्ज और कानुन, प्यासा सावन व जस्टिस चौधरी थेंज्याःगु आपालं फिल्मय् थथे बुरा नं ल्याय्म्ह नं जुयाः म्हितलसा अमिताभ बच्चनं अदालत, देशप्रेमी अले राजेश खन्नां दर्द, धर्म और कानुन थेंज्याःगु आपालं फिल्मय् थथे डबल रोल म्हितल । लिपा वना थःपिनिगु उमेर कथंया हे फिल्म म्हिता यंकल ।

राजेश खन्ना, जितेन्द्र, शशी कपुर थेंज्याःपिं स्टारत दुहां वये न्ह्यःया स्टारत राज कपुर, देव आनन्द व दिलिप कुमार जक मखसे शम्मी कपुर, राजेन्द्र कुमार थेंज्याःपिं उगु जमानाया लोकंह्वानाच्वंपिं स्टारतय्सं नं फिफ्टी सिक्स्टी प्लसया उमेर तक हिरो हे जुयाः म्हितेगु कुतः याःगु खः ।

आः वया शाहरूख खान, आमिर खान, सलमान खान जक मखसे अक्षय कुमार व अजय देवगन नं व हे लँपुइ लानाच्वंगु दुसा अनिल कपुर व सञ्जय दत्त थेंज्याःपिं फिफ्टिी सिक्स्टी प्लस हिरोत क्यारेक्टर कथं रोल म्हिताः जूसां थःत बलिउडय् फिट याना तयेगु कुतः यानाच्वंगु दु ।

ई हिला वंलिसे स्वकुमिपिं न्हू पुस्तायापिं दुहां वइगुलिं यानाः पुलां पुस्ताया स्टारतय्सं याइगु उमेरं मल्वःगु रोलयात स्वकुमिं स्वीकार याइमखु धइगुया दसु कथं थुगुसी पिहांवःगु फिफ्टिी प्लस हिरो गोविन्दाया रंगीला राजा व फ्राई डे अले सिक्स्टी प्लस हिरो सन्नी देवलया मोहल्ला अस्सी व भैंयाजि सुपरहिटयात स्वकुमिं मिखाबागलं तकं नं मस्वःगुलिं हे क्यं धायेमाः ।

 

सम्बन्धित बुखँ

LEAVE YOUR COMMENTS