न्हूसतक पेटी सम्बन्धी रिपोर्ट मंसिर २ गते
येँ (नेपालभाषा टाइम्स)- न्हूसतकय् पेटी तब्या यायेगु येँ मनपाया कुतः विरुद्ध जूगु संघर्षय् ग्वाहालि याःपिं सकलें स्थानीय जनता लिसें थीथी थाय्यापिं जनप्रतिनिधिपिंत म्हिगः सुभाय् देछायेगु ज्या जुल । येँ मनपाया २२ वडाया अध्यक्ष चिनीकाजी महर्जनं थ्व संघर्षय् स्थानीय जनताया कुतलं येँ मनपां लिचिउगु खँ कनादिल ।
ज्याझ्वलय् बागमती प्रदेशया सांसद लिसें पूर्व मन्त्री शैलेन्द्र वज्राचार्य, नुरज वज्राचार्य, येँ मनपाया प्रवक्ता लिसें १७ वडाया अध्यक्ष नवीन मानन्धर, नेपाली कांग्रेसया प्रतिनिधि निलकाजी शाक्य, जसपाया प्रतिनिधि राधाकृष्ण महर्जन आदिपिंसं नं सम्बोधन यानादीगु खः । ज्याझ्वलय् उगु लागाया सांसद कृष्णगोपाल श्रेष्ठ नापं वडा नं. १५, १८, २१, २३, ३२ या वडा अध्यक्षपिनि नं उपस्थिति दुगु खः ।
न्हूसतकय् पेटी तब्या यानाः सतक चिब्या यायेगु मनपाया ग्वसाः विरुद्ध २२ वडाया स्थानीय जनतां चान्हय् तकं धर्ना बियाः प्रतिकार यायेवं मनपां अन तत्काल पेटी तब्या मयायेगु बरु थुकिया बारे अध्ययन यानाः उकिया रिपोर्ट कथं ज्या न्ह्याकेगु धकाः सहमति याःगु खः । मेयर, उपमेयर, प्रमुख प्रशासकीय अधिकृत व नापं वडाया अध्यक्षपिं च्वनाः याःगु उगु सहमति कथं पेटी चिब्या यायेबलय् उकिं लाकीगु सामाजिक, आर्थिक, सांस्कृतिक लिच्वः बारे अध्ययन यानाः प्रतिवेदन बीगु व लिपा उकिया लिधंसाय् निर्णय यायेगु खँ जूगु दु ।
थुकिया लागिं मनपा शहरी योजना आयोगया उपाध्यक्ष सुरज राजभण्डारीया अध्यक्षताय् छगू कार्यदल दयेकूगु दुसा कार्यदलयात थ्वहे वइगु मंसिर २ गते प्रतिवेदन लःल्हायेगु ई बिउगु दु । कार्यदलं प्रतिवेदन लःल्हायेधुंकाः उकियात कयाः हानं सहलह यायेगु व वयां लिपा निर्णय यायेगु सहमति नं जूगु दु ।
LEAVE YOUR COMMENTS