चक्रपथया निगूगु खण्ड सतक विस्तारया तयारी

येँ – चक्रपथ लागाया न्हापांगु खण्डया रुपय् कयातःगु कोटेश्वर–कलंकी सतक विस्तार व स्तरोन्नति लिपा आः उगु सतकया निगूगु खण्डया रुपय् कलंकीनिसें महाराजगंज तकया सतक विस्तार, सुधार व स्तरोन्नति याइगु जूगु दु । कोटेश्वर–कलंकी सतक विस्तार यानाः हस्तान्तरणतकं जुइधुंकाः आः कलंकी–महाराजगंज सतक विस्तारया तयारी शुरु याःगु खः ।

सडक विभागयाकथं चक्रपथया न्हापांगु खण्डया सतक विस्तार यानाः हस्तान्तरण तकं यायेधुंकाः आः निगूगु खण्डया रुपय् कलंकी–महाराजागंज सतक सुधारया निंतिं विस्तृत परियोजना प्रतिवेदन (डीपीआर)या ज्या जुयाच्वंगु दु । सडक विभागया वैदेशिक समन्वय महाशाखा प्रमुख संजयकुमार श्रेष्ठं कनादीकथं न्हापांगु खण्डय् थें हे निगूगु खण्डया सतक विस्तार व स्तरोन्नतिया निंतिं नं चिनिया पक्षं हे सतकया अध्ययन यानाच्वंगु दु ।

सतक सुधारया प्रारम्भिक प्रतिवेदन वयेवं उकी आवश्यक सुझाव दुथ्याकाः लिपांगु प्रतिवेदन तयार यायेगु व निगुलिं प्रतिवेदनया अध्ययन चिनिया पक्षं हे याइगु जानकारी वय्कलं बियादिल । प्रतिवेदनय् दुथ्याकेमाःगु विषयय् थःपिंसं सुझाव बिया वयाच्वनागु प्रमुख श्रेष्ठं धयादिल ।

वय्कलं कोटेश्वर–कलंकी सतकखण्डपाखें सयेकागु, थुइकागु खँ थुगु सतकखण्डय् लागू यायेत विभागं चिनिया पक्षयात इनाप याना वयाच्वनागु जानकारी बियादिल । कोटेश्वर–कलंकी सतकखण्डया ज्या जूगु इलय् ध्यानय् तये मफुगु सतक चिं, आकाशे ताँ, जेब्रा क्रसिंग थेंज्याःगु खँय् ध्यान बीत चिनिया पक्षयात इनाप यानाच्वनागु वय्कलं धयादीगु दु ।

नेपाः व चीनया सांस्कृतिक भिन्नताया कारणं कोटेश्वर–कलंकी सतकखण्डय् समस्या खने दुगु धासें वय्कलं धयादिल, ‘चीनय् रोड डिभाइडरया ज्या सतक चिन्हं याइगु खःसा थन धाःसा पःखाःया आवश्यक जूगु थःपिनिगु विचाः दु ।’आकाशे ताँ, जेब्राक्रसिंग, अन्डरपास गन गन तयेगु व ग्वःगू आवश्यक जुइ धइगु विषयय् चीनं लगानी याइगुलिइ निर्भर जुइगु विभागं स्पष्ट याःगु दु ।

 

सम्बन्धित बुखँ

LEAVE YOUR COMMENTS