सापारु झाँकीयात सिरपाः, गुरुपिंत सम्मान
ख्वप (नेपालभाषा टाइम्स)÷ख्वप नगरपालिकां थुगुसी सापारुया लसताय् थन पिहां वःगु सांस्कृतिक झाँकीइ उत्कृष्ट जूपिंत सिरपाः व दसिपौ लःल्हाःगु दु । वंगु मंगलवाः ४३ क्वःगु विश्व पर्यटन दिवसया लसताय् ख्वप लाय्कुलिइ छगू ज्याझ्वः यासें सापारुया झ्वलय् पिहां वःगु घिन्तांघिसि, परम्परागत व आधुनिक विधाय् उत्कृष्ट जूपिंत सिरपाः व दसिपौ लःल्हाःगु खः ।
नेपाल मजदुर किसान पार्टीया केन्द्रीय नायः नारायणमान बिजुक्छेँ उत्कृष्ट झाँकीयात नगद पुरस्कार व दसिपौ लःल्हानादीगु खः । ज्याझ्वलय् घिन्तांघिसि, माकः प्याखं, आधुनिक विधा व परम्परागत विधाय् उत्कृष्ट जुयादीपिं व उत्कृष्ट कलाकारपिंत दसिपौ व सिरपाः लःल्हाःगु खः । अथे हे झाँकीया मूल्यांकन यानादीपिं व ग्वाहालि यानादीपिंत मतिनाया चिं नं लःल्हाःगु खः ।
उगु इलय् ज्याझ्वःया मूपाहां बिजुक्छें सांस्कृतिक गुरुपिंत नं हनेज्या यानादीगु खः । ख्वप नगरया थीथी वडाया नीनिम्ह सांस्कृतिक गुरुपिंत दोसल्ला न्ययेकाः म्हति झिंन्याद्वः तका दांलिसें सम्मान पत्र लःल्हानादीगु खः ।
ज्याझ्वलय् नवासें वय्कलं झीगु कला, संस्कृति झीगु थःगु हे सम्पत्ति खः धासें थुकिया संरक्षण, प्रवद्र्धन व संवद्र्धन यायेगु ज्याय् स्थानीय सरकार, सहकारी संस्था व विद्यालय क्रियाशील जुइमाः धयादिल । परम्परागत सांस्कृतिक प्याखं व मेमेगु गतिविधिइ मिसातय्गु सहभागिता उत्साहजनक रुपं अप्वया वनाच्वंगुलिं लसता प्वंकादिसें ख्वपया कला, संस्कृति ल्यंका तयेत थनया हे कलाकार, ल्वहंकःमि, सिकःमितय् ज्वःमदुगु योगदान दुगु वय्कलं कनादिल । ख्वप देय् थः हे छगू खुल्ला विश्वविद्यालय जूगु व थनया सांस्कृतिक गुरुपिं स्वयम हे समाजया सम्मानित प्राध्यापक जूगु
वय्कःया धापू दु ।
नेमकिपाया सचिव पे्रम सुुवालं ख्वप लाय्कुलिइ च्वंगु राष्ट्रिय कला संग्रहालय भवनया पुनःनिर्माण मल्लाकालीन शैलीं जुइमाःगु खँय् बः बियादिल । नगर प्रमुख सुनिल प्रजापतिं सांस्कृतिक गुरुपिनिगु योगदान अतिकं च्वछायेबह जूगु धासें वय्कःपिं विश्वविद्यालयया प्रमाणपत्र विनाया प्राध्यापक खः धयादिल ।
ज्याझ्वलय् नेमकिपाया केन्द्रीय दुजः सुरेन्द्रराज गोसाइँ, संस्कृतिविद् विश्वमोहन जोशी, मूल्यांकनकर्ता इन्दिरा लाछिमस्यू, ७ वडाअध्यक्ष उकेश कवां, ९ वडाअध्यक्ष रविन्द्र ज्याख्वं नं नुगःखँ तयादीगु खः।
LEAVE YOUR COMMENTS