बंगलादेशय् खने दया वःगु तानाशाही

बंगलादेशय् जूगु आम चुनावं विश्वया जनतायात हे ध्यान केन्द्रित यानाच्वंगु दु । विश्वया जनताया ध्यान केन्द्रित जुयाच्वंगु कारण छगू ला बरोबर सेनां कू यानाच्वनीगु देश जुयाः खःसा मेगु कारण अतिवादीतय्गु नं प्रभाव अप्वया वनाच्वंगुलिं खः । अथेहे बंगलादेशय् नं मध्यपूर्वया देशय् थें आतंकवादी घटना अप्वया वइ ला धकाः खःसा मेगु कारण नेतातय्गु गतिविधिं यानाः प्रजातान्त्रिक लक्ष्ययात ध्याकुनय् तयाः स्वच्छाचारी पहलं यानाः हानं सेना न्ह्यःने न्ह्याः वइगु खःला धकाः नं खः ।

थ्व खँय् बंगलादेशया जनतां जक मखु विश्वया जनतां तक नं चिउताः कयाच्वंगु दु । बंगलादेशय् मुख्य यानाः स्वंगू पार्टीया बोलबाला दु । छगू अवामी लिग । थ्व पार्टीया नेतृत्व यानाच्वंम्ह शेख हसिना खः । वय्कः आः नं प्रधानमन्त्री जुयाः सत्ता न्ह्याकाच्वंम्ह नेतृ खः । मेगु पार्टी खः बंगलादेश नेशनल पार्टी । थ्व पार्टीया नेतृत्व यानाच्वंम्ह खालिदा जिया खः ।

नेतृ खालिदा जिया नं निक्वः तक चुनाव त्याकाः सत्ता संचालन यायेधुंकूम्ह नेतृ खः । मेगु खः पार्टी जमान ए इश्लाम । थ्व पार्टीयात सत्ता संचालन यायेगु मौका आःतक मवःनि । थ्व पार्टीया प्रभाव नं विस्तारं बढे जुया वनाच्वंगु दु । विशेष यानाः थ्व पार्टीयात साथ बियाच्वंपिं जनता स्वयां नं कट्टरपन्थी मुस्मांत खः ।

बंगलादेशया जनतां स्वंगू पार्टीतय्त थथे धायेगु याना वयाच्वंगु दु । अवामी लिग पार्टीयात भारत प्रति झुकाउ दुम्ह पार्टी खः धाइ । मेगु पार्टी बंगलादेश नेशनालिष्ट पार्टीयात राष्ट्रवाद पार्टी नं धाइ । जमान ए इस्लामीयात कट्टरवादीतय्सं संचालन याना वयाच्वंगुलिं यानाः थ्व पार्टीया सम्बन्ध कट्टरवादी आतंकवादी संगठननाप नं अवश्य हे दयेमाः धकाः अनुमान यानाच्वनी ।

बंगलादेशया आम चुनावय् अवामी लिग त्यात धकाः घोषणा यायेसातकि भारतया प्रम नरेन्द्र मोदीं शेख हसिनायात बधाई बीगु ज्या यात । वास्तवय् चुनाव निष्पक्ष मजू धकाः मोदीं मसिउगु मखु, तर बधाई बिल ।

डिसेम्बर ३०, पुस १५ गते जूगु बंगलादेशया चुनावया लिच्वः अर्थात ३०० सिटय् जूगु परिणामय् २८८ सिट ला वर्तमान सत्ता चले यानाच्वंम्ह पार्टी अवामी लिगं त्याकल । खाली ७ सिट जक विएनपीया ल्हातय् वलसा बाँकी क्षेत्रीय पार्टीतय्सं त्याकल धकाः मिडियां बय्बय् यायेगु ज्या यात । चुनावया परिणामं क्यना बिल हानं शेख हसिना प्रधानमन्त्री जुइगु निश्चित जुइधुंकल ।

तर चुनावया परिणामयात विपक्षी पार्टीतय्सं अस्वीकार यात । विपक्षी पार्टीतय्सं आरोप बियाच्वंगु दु, फुक्क धयाथें विपक्ष पार्टीया नेतांनिसें कार्यकर्तातय्त बन्दी यानाः अझ विपक्ष जनतायात तक नं भोट बीगु वातावरण खत्तम यायेगु ज्या प्रशासनं यात । थ्व हे कारणं यानाः सलंसः उम्मेदवारतय्सं अन्तिम घडिइ वयाः थःगु उम्मेदवारी तकं लित काल ।

सेना व पुलिसया घेरा दुने जूगु मतदान स्वच्छ जुइ मखु, थ्व चुनाव धाँधलीया नापनापं एकपक्षीय जूगु दु, उकिं चुनावयात स्वीकार यायेफइ मखु धकाः विपक्षी पार्टीत सशक्त ढंगं न्ह्यःने वयाच्वंगु दु । अझ ला दक्षिण एशिया स्वइगु ह्युमन राइट वाचया निर्देशक मिनाक्षी गांगुलीं तकं चुनाव स्वतन्त्र व निश्पक्ष मजुल धकाः विरोध यायेधुंकल ।

बंगलादेशय् आम चुनाव सम्पन्न जुइधुंकल । चुनाव त्याकूम्ह पार्टी विजय जुलसु पिहां वयेगु आँट मयाः, छाय्धाःसा फुक्क विपक्षी पार्टीत छप्पँ जुयाः विजय जुलुस भाँडे यायेगु जुइ धकाः ख्याच्वः तकं बिउगुलिं दु । अवामी लिगया उच्च नेतातय्सं नं घोषणा यात, विजय जुलस वयेगु स्वयां नं देशय् शान्ति वातावरण हयेमाःगु दु ।

थ्वया अर्थ खः, यदि विजय जुलुस पिहां वल धाःसा छुं नं अप्रिय घटना जुइफु । बंगलादेशया आम चुनावय् अवामी लिग त्यात धकाः घोषणा यायेसातकि भारतया प्रम नरेन्द्र मोदीं शेख हसिनायात बधाई बीगु ज्या यात । वास्तवय् चुनाव निष्पक्ष मजू धकाः मोदीं मसिउगु मखु, तर बधाई बिल । बधाई बिउगुया अर्थ भारतभक्त नेतृ सत्ताय् वइगु जूगुलिं यानाः खः ।

भारत खुशी जूगु धयागु अमेरिका नं लय्ताःगु खः । भारत व अमेरिकाया स्वार्थ खः दक्षिण एशियाय् चीनया प्रभाव कम याना वनेगु रणनीति । थ्वहे कारणं यानाः न्ह्यागु षडयन्त्र यानाःसां थःगु पक्षयापिं नेतातय्त सत्ताय् हयेगु लागि अनेक तिकडम म्हिताच्वनीगु खः । तर दक्षिण एशियाया जनतात नं भारत व अमेरिका धालकि वाक्क दिक्क जुयाच्वनी, कारण भारत व अमेरिका देशयात भिंकीपिं मखु ।

खाली स्यंकीपिं जक खः । वास्तवय् इन्डो प्यासिफिक फोरम गठन जूगु कारण नं चीनया शक्तियात माइनस यायेगु छगू खेल खः । थ्व फोरम नं अमेरिकाया इशाराय् चले जुयाच्वंगु खः । अमेरिकाया उद्देश्य खः, यदि चीनया शक्ति छिन्नभिन्न यायेफत धाःसा अमेरिका अझ नं ताःई तक विश्वया नम्बर वान शक्तिशाली जुयाच्वनी ।

थ्वहे कारणं यानाः दक्षिण एशियाय् भारतयात न्ह्यःने हयाः अमेरिकाया लक्ष्य पूरा यायेगु खेल जुयाच्वंगु खः । भारतं श्रीलंका, माल्दिभ्स, आः वया बंगलादेशया राजनीति अप्वः चिउताः तयाच्वंगु कारण नं थथे हे जुयाः खः । बंगलादेश स्वतन्त्र जूगु इतिहास बारे छुं भचा उल्लेख यायेगु स्वये । सन् १९७१ साल न्ह्यः तक बंगलादेशयात पूर्वी पाकिस्तान धाइ ।

व इलय् पूर्वी व पश्चिमी पाकिस्तान छगू हे देश जुयाच्वंगु खः । पाकिस्तान बंगलादेशयात शासन याना वयाच्वंगु खः । पाकिस्तानया सैनिक शासक बंगलादेशया जनतायात अति शोषण व दमन यानाच्वंगुलिं यानाः बंगलादेश स्वतन्त्रताया लागि जनतां सतकय् कुहां वयेगु यात । देश स्वतन्त्र संग्रामया नेतृत्व शेख मुजिवर रहमनं यात ।

आखिरय् सन् १९७१ साल पाखें पाकिस्तानया सैनिक शासन पाखें देश स्वतन्त्र जुल । देश स्वतन्त्रताया लागि भारतं थःगु सैनिक परिचालन याःगुलिं यानाः देश स्वतन्त्र जूगु खः । पाकिस्तान पाखें देश स्वतन्त्र जूसां नं भारतया इशाराय् मुजिवर रहमन प्याखं हुलिगु यानाच्वन । शेख मुजिवर रहमान देश विकासया लागि भिजन दुम्ह नेता खः ।

तर भारतया दबावं यानाः शेख मुजिवरया भिजनं हावा नल । जब भारत नाप फरक्का बाँधया विषयय् लः बाँडफाँडया लागि सम्झौता यात व इलंनिसें शेख मुजिवरं देश घातक ज्या यात धकाः सारा जनता आक्रोशित जुल । वहे मौकाय् सैनिक मार्फत शेख मुजिवरया फुक्क परिवार हे स्याना बिल ।

खालि शेख मुजिवरया म्ह्याय् शेख हसिना बेलायतय् अध्ययनया लागिं वनाच्वंगुलिं जक बचे जुइत सफल जुल । शेख हसिनां सन् १९९६५, २००८ सालय् सत्ता संचालन यायेधुंकूम्ह नेतृ खः । आः नं प्रम जुइगु अवसर वःगु दु, शेख हसिना सफल नेतृत्व यायेत सफल जुइगु खः कि मखु स्वये ल्यं दनि ।

सम्बन्धित बुखँ

LEAVE YOUR COMMENTS