लुम्बिनीइ ‘जय श्रीराम’ या विरोध
येँ (नेपालभाषा टाइम्स)÷लुम्बिनीइ मोरारी बापुया राम कथा वाचन ज्याझ्वलय् ब्वति काः वःपिं कार्यकर्तातय्सं बुद्ध जन्मभूमिइ ‘जय श्रीराम’ धकाः नारा थ्वयेकूगु खँयात धर्मोदय सभां विरोध याःगु दु । म्हिगः धर्मोदय सभाया महासचिव सागरमान वज्राचार्यं छगू वक्तव्य पित बिसें लुम्बिनीइ हिन्दू धर्मया ज्याझ्वः याके बी मजिउ धकाः शान्तिपूर्ण प्रदर्शन याःपिं स्थानीय बौद्धमार्गीतय्त हिन्दू अतिवादीतय्सं कथि, भाता थेंज्याःगु ल्वाभः छ्यलाः आक्रमण याःगु व उमिसं ‘जय श्रीराम’ धकाः नारा थ्वयेकूगु धासें उकिया विरोध याःगु खः ।
उगु ज्याझ्वःया विरोधय् स्थानीय संयुक्त संघर्ष समितिं याःगु ज्याझ्वःयात समर्थन यासें उकी लानाः घाःपाः जूपिं अभियन्तातय् भिं उसाँय्या कामना नं वक्तव्यय् यानातःगु दु ।
लुम्बिनीइ थ्व समस्या पिहां वःगुया कारण लुम्बिनी विकास कोषया पदाधि–कारीतय् अपरिपक्वता खः धकाः नं वक्तव्यय् आलोचना यानातःगु दु ।
अथे हे भक्तपुर बौद्ध समाजपाखें नं छगू वक्तव्य पितबिसें लुम्बिनीइ न्हापा नं थज्याःगु हे हिन्दू ज्याझ्वः यायेगु तयारी जूबलय् विरोधया कारणं ज्याझ्वः रद्द याःगु खँ स्मरण याःगु दु ।
LEAVE YOUR COMMENTS