छगू हे थासय् स्वनिगःया सम्पदा

रासस- देगःया देगलं जाःगु सहरया रुपय् म्हसीया वयाच्वंगु येँया ऐतिहासिक व धार्मिक धरोहरय् छि गुलितक चाःहिला दियागु दु ? यदि बांलाक चाःहिलादीगु मदु धइगु खःसा अज्याःगु दृष्य छगू हे थासय् स्वयेगु ह्वःताः त्वःफिकादीमते खं ला !

नेपाल कला परिषदय् ‘मोमेन्ट्स विथ हेरिटेज’ अन्तर्गत वंगु मंगलवाःनिसें शुरु जूगु चित्रकला ब्वज्याय् उगु अवसर प्राप्त यानादीफइ । व जम्मा छवाःया निंतिं जक । स्वनिगःया थीथी झिंन्यागू थाय्या ऐतिहासि, पुरातात्विक व धार्मिक सम्पदाया महत्वं जाःगु सम्पदाया ६६ म्ह चित्रकारया १६५ पाः स्वयां अप्वः चित्र ब्वज्याय् तयातःगु दु ।

येँ, यल व ख्वप लाय्कू, स्वयम्भू, टेकु, गुहेश्वरी, च्वबहाः, बुंग, शंखम्वः, थिमि, चाँगुनारायण, ख्वना, पुलांगु गुहेश्वरी, लुभु, वज्रवाराही व खास्थि स्तूपाया ल्वःवनापुसे च्वंगु दृश्यत चित्रकलाय् स्वये खनी । चित्रकारं सम्पदा व पुरातत्वया दृष्टिकोढां अतिकं महत्वपूर्ण माने यानातःगु लिच्छवीकालीन ईनिसेंया कला–कौशलया देगः, स्तूपा, व उकिया जःखःया यइपुसे च्वंगु दृश्य क्यानभासय् कियातःगु दु ।

कला प्रदर्शनीया अवलोकन यासें पुलांम्ह प्रधानमन्त्रीलिसें नेपाल कम्युनिष्ट पार्टी (नेकपा)या नेता झलनाथ खनालं स्वनिगःयात बांलाक थुइके फइकथं चित्रकला ब्वज्या यानातःगु धयादिल । ‘स्वनिगः दुनेया सभ्यता, मठ–मन्दिर, लाय्कूयात बांलाःगु धंगं प्रतिविम्बित जूगु दु’, नेता खनालं धयादिल, ‘विकासि जुजुं वयाच्वंगु नेपाली परम्परागत व बुद्धकालीन ईनिसेंया दृश्य ब्वज्याय् लुइ फइ ।’

चित्रकार दिवेश प्रधान व राकेशचन्द्र श्रेष्ठं वंगु भदौ १६ गते येँया हनुमानध्वाखां ‘शनिवारीय स्थलगत चित्रकला कार्यशाला’ शुरु यानादीगु खः । उगु अभियान विस्तार जुजुं वनाः १५ गू श्रृंखलातक कियातःगु चित्रया मुना खः, थुगु चित्रकला ब्वज्या । शुरुवातया इलय् निम्हेसिनं शुरु याःगु अभियानय् चित्रकार दिपेन्द्रमान बनेपाली, केशवराज खनाल, रामकृष्ण थापा नं सरिक जुयादिल । बुलुहुं मेपिं चित्रकार नं उकी सहभागि जूगु खः ।

स्वतःस्पूmर्त रुपय् चित्रकार सहभागि जुयाः फेसबुकपाखें मतदानया लिधंसाय् हरेक शनिवाः थाय् ल्ययाः कार्यशालाय् चित्रकार सहभागि जुइगु खः । १५ गू श्रृंखलातक चित्रकारं वर्तमान स्वनिगःया धरोहरया न्ह्यःने हःगु दु ।

चित्रकला ब्वज्याया अवलोकन लिपा राष्ट्रिय समाचार समिति (रासस)या अध्यक्ष श्यामल अधिकारीं धयादिल, ‘कलाकारं कला निर्माण याइबलय् सम्पदा निर्माण यानाच्वंगु दइ, चित्र कीबलय् संरक्षण तकं यानाच्वंगु दइ, थ्व ब्वज्या स्वयेबलय् व हे थुइके फइ ।’ सम्पदा निर्माण, उकिया संरक्षण व प्रचारय् कलाकार स्वयम थःहे लगे जुयाच्वनीगु थ्व अजू चायापुगु अवसर जूगु धासें अध्यक्ष अधिकारीं थुकिं झी पुर्खाया कला कौशलयात न्ह्यःने हयेत ग्वाहालि याइगु खँ न्ह्यथनादिल ।

राससं थ्व अभियानयात ग्वाहालि यायेगु प्रतिवद्धता प्वंकादिसें वय्कलं दक्षिण एशियाया गुलिखे कला गबलें गबलें अभद्र रुपय् प्रस्तुत जुइगु यानाच्वंगु खँय् चिउताः प्वंकादिल । वय्कलं स्वनिगलय् जक केन्द्रीत मयासे कर्णालीया सिञ्जा व दुल्लु थेंज्याःगु थासय्या दृश्ययात नं चित्रकलाय् क्वत हयेत चित्रकारयात इनाप यानादिल ।

संस्कृतिविद् प्रा. डा. प्रेमकुमार खत्रीं चित्रय् देगःया दृश्ययात केन्द्रीत यानातःगु खँय् लसता प्वंकादिसें जनजीनया चित्रयात थाय् बीत इनाप यानादिल । मूत चित्रय् स्वानातःगु अमूर्तयात तकं न्ह्यःने हयेमाःगु खँय् वय्कलं बः बियादिल । शनिवारीय स्थलगत चित्रकला कार्यशालाय् थः नं तःक्वः तःक्वः सहभागि जुयागु अनुभव न्यंकादिसें प्रज्ञा प्रतिष्ठानया नवनियुक्त कुलपति केके कर्माचार्यं चित्रकारया थ्व अभियानं सम्पदायात सुरक्षा यानाच्वंगु विचाः तयादिल । थज्याःगु अभियानं सम्पदा गुगु अवस्थाय् दु धइगु खँया जानकारी याकी धासें वय्कलं कलाया विकासय् थः प्रतिवद्ध जुयाः लगे जुइगु प्रतिवद्धता प्वंकादिल ।

१५ गू श्रृंखलातकया मुख्य अभियानकःमि दिवेश प्रधानं शुरुया इलंनिसेंया अनुभव न्यंकादिसें थुलि तःधंगु ब्वज्या जुइ धकाः थम्हं विचाः तकं मयानागु व थुगु ज्याझ्वलं थप हौसला बिउगु धयादिल । शुरुया इलय् निम्हेसिनं जक थ्व अभियान न्ह्याकागु खःसा नं थुकी कथहं चित्रकार थप जुजुं वंगु खः । आः स्वनिगः पिनेया जिल्लाय् तकं ‘स्थलगत चित्रकला कार्यशाला’या अभियान शुरु जूगु व थुगु ब्वज्याय् पिनेया जिल्लाया नं चित्र दुथ्याकागु प्रधानं जानकारी बियादिल । थुगु ब्वज्या छवाःतक न्ह्याइ ।