ने. सं. ११४४ कौलाथ्व तृतीया -

जनयुद्धय् घाःपाः जूपिं लडाकूत अलपत्र

येँ – माओवादीं न्ह्याकूगु झिदँ ताःहाकःगु जनयुद्धय् लानाः घाःपाः जूपिं लडाकूत थौंकन्हय् अलपत्रय् लाःगु दु । अथे अलपत्र अवस्थाय् लाःपिं मध्ये खुम्ह घाइते लडाकूतय्सं थनया माइतीघर मण्डलाय् अनसन हे च्वनाः थःपिंत उद्धार यायेत माग याःगु दु । अनसन च्वनाच्वंम्ह दैलेखया नरबहादुर दमाइया तुतिइ अझ नं गोली लानाच्वंगु दनि । तर गोली लिकाये फयाच्वंगु मदु । अथे हे जुम्लाया बीर बहादुर परियारया गोलीया छर्रां लानाः मिखा तज्याःगु दु । बांलाक उपचार मजुयाः वय्कलं बांलाक मिखां मखं ।

बर्दियाया लीलाचन्द्र कामीं थःगु उपचार यायां छुं भचा दुगु छेँ व बुँ समेत मी धुनागु खँ धाःगु दु । अय्नं वय्कःया घाः धाःसा लंगु मदुनि । कालिकोटया मन दर्जीया नं तुति आः तकं लंगु मदुनि । थुकिं यानाः वय्कःया न्यासि वनेत तकं थाकु । कालिकोटया हे संग्राम सार्कीयात निपां तुतिइ गोली लाःगु खः । वासः याये मफयाः तुतिं चुइत तकं थाकुगु खँ वय्कलं कनादीगु दु । अथे हे मकवानपुरया मंगलसिंह प्रजाया बपिक्वँय् त्वःधुलाः जुइत तकं थाकुयाच्वंगु दु ।

शरीरं फुबलय् जनयुद्धय् लगे जुया, आः घाःपाः जुयाः सने मफुगु अवस्थाय् सुनां हे वास्ता मयाःगु खँ उमिसं धाःगु दु । थःपिनिगु थ्व अवस्थाय् जनयुद्धया तत्कालीन कमाण्डर प्रचण्डं हे थःपिंत स्वः वयेमाःगु माग नं उमिसं याःगु दु ।

आः घाःपाः जुयाः छुं ज्या नं याये मफुगु अवस्थाय् लानाच्वंगु जुयाः थज्याःगु इलय् थःपिंत जनयुद्धया नेतातय्सं वास्ता मयाःगु द्वपं नं वय्कःपिंसं बिउगु दु । आः सी व म्वायेगुया फरक मदु धासें वय्कःपिंसं अनसन च्वँच्वं सी माःसां मत्वःतेगु खँ नं धाःगु दु ।