तिवारीया अभिव्यक्तियात नेवाःतय् विरोध

येँ – उपत्यका विकास प्राधिकरणया प्रमुख भाइकाजी तिवारीं स्वनिगलय् आदिवासी जनजाति धइपिं सुं मदु धकाः बिउगु अभिव्यक्तियात नेवाः देय् दबुलिं भत्र्सना याःगु दु । देय् दबूया नायः नरेश ताम्रकारं छगू वक्तव्य पिकासें स्वनिगःया आदिवासी नेवाःतय्त लक्षित यासें सडक विस्तार व विकासया नामय् ऐतिहासिक, धार्मिक, सम्पदा, सांस्कृतिक धरोहर नष्ट यानाः नेवाःतय्त विस्थापित यायेगु ज्याय् न्ह्यचिला च्वंम्ह तिवारीया धापू घोर आपत्तिजनक व निन्दनीय जूगु खँ धयादीगु दु ।
वक्तव्यय् नेपाल सरकारया मिति २०५३ असार २३ गते राजपत्र भाग ३ स प्रकाशित आदिवासी जनजातिया अनुसूचीइ नेवाःयात दुथ्याकातःगु लिसें आदिवासी जनजाति उत्थान राष्ट्रिय प्रतिष्ठान ऐन २०५८ या आदिवासी जनजाति धलखय् नं नेवाःयात दुथ्याकातःगु दु धासें उपत्यका विकास प्राधिकरण थेंज्याःगु जिम्मेवार सरकारी पदय् च्वनाच्वंम्ह मनुखं थथे न्ववायेगु संविधान व कानूनया बर्खिलाप जूगु खँ धयातःगु दु ।