मेगु छु याये फइ ?

हालय् । प्रधानमन्त्री केपी ओलीं थःत कुंखिनेत ताःलाःपिं बुद्धिजीवि व राजनीतिक विश्लेषक विश्लेषकतय्त चुनौति बियाः धाइ । ‘बुद्धिजीवि धाःपिं सु गज्याःपिं जिं म्हमसिउ । बहस यायेत जि तयार जिं छम्ह छम्हेसित क्वःथलेफु । यानाबी ।’ हालय् देशय् जूगु छगू विदेशी सम्मेलनय् प्रधानमन्त्रीं ब्वति काःगु खँय् प्रधानमन्त्रीया प्यखेरं आलोचना जुइ ।

विवाद पिहां वइ । धाइ व सम्मेलन क्रिश्चियन धर्मावलम्बितय् आयोजनाय् जूगु खः ।प्रधानमन्त्रीजु स्वयम स्वन्हुतक सोल्टी होटलय् च्वनी । व सम्मेलनय् ब्वति कायेत । आयोजक संस्थां प्रधानमन्त्री ओलीजुयात कुशल शासकया रुपय् कदर यासे तक्मा प्रदान याइ । प्रधानमन्त्रीजुं तक्मा स्वीकार याइ । प्रधानमन्त्रीजुं विवादास्पद सम्मेलनय् सक्रिय ब्वति काल ।

थ्व शोभनीय मजुल । धर्म निरपेक्षी देशय् । क्रिश्चियन धर्मयात सरकारीस्तरं छाय् च्वय् च्वय् धायेकल । छथ्वः बुद्धिजीवितसें थ्व सम्मेलन राष्ट्रघाती खंकी । प्रधानमन्त्रीजुं थ्व सम्मेलनय् क्यंगु सक्रियता गलत खः । खतरापूर्ण । बुद्धिजीवितय्सं आक्रामक धंगं प्रतिक्रिया प्वंकी । स्वयम प्रधानमन्त्रीजुया सत्तारुढ दलया छम्ह होनहार नेता भीम रावलं हे नं थ्व क्रिश्चियन सम्मेलनय् प्रधानमन्त्री स्वयमया सक्रिय सहभागितायात कयाः तिक्त, कटु आलोचना याइ । थ्व प्रकरणयात पार्टीं गम्भिर धंगं बहसय् हये ।

छथ्वः बुद्धिजीवि, राजनीतिक विश्लेषकतय् तिक्त आलोचना न्यनाः प्रधानमन्त्रीजुं नं प्रतिआक्रमण भासं थःगु प्रतिक्रिया बी । बुद्धिजीवि धाःपिंलिसे खुल्ला बहस यायेत थः तयार छम्ह छम्हेसित माथ नका बी अर्थात क्वथला बी ।

अठोट प्वंकी । विशेष यानाः छथ्वः बुद्धिजीवि, राजनीतिक विश्लेषकतय् तिक्त आलोचना न्यनाः प्रधानमन्त्रीजुं नं प्रतिआक्रमण भासं थःगु प्रतिक्रिया बी । बुद्धिजीपि धाःपिंलिसे खुल्ला बहस यायेत थः तयार छम्ह छम्हेसित माथ नका बी अर्थात क्वथला बी । हाँक बी । आक्रोश प्वंकी । प्रधानमन्त्रीजुया आवेशं जाःगु हाथ्या पिहां वसेंलि थ्व विषयं न्हूगु मोड काइ ।

बुद्धिजीवि व पत्रकारतय्सं प्रधानमन्त्री ेथेंज्याःम्ह राष्ट्रया अभिभावकं थज्याःगु क्वह्यंगु असहिष्णु भाय् छ्यले मजिउ । थ्व अशोभनीय खः । प्रधानमन्त्रीं धैर्य कयाः थःगु खँ जनतायात थुइकेमाः । अःखः चुनौतिया भाय् नवानाः जनतालिसें जोरि खोजे याये मजिउ । चौतफिं टिकाटिप्पणी जुइ । टि.भी. छगू ज्याझ्वः ।

विषय प्रधानमन्त्रीजुया कथित क्रिश्चियन सम्मेलनय् ब्वति काःगुयात कयाः । सहभागिताय् प्रधानमन्त्रीजुया प्रेस सल्लाहकार व अन्य मेपिं निम्ह बुद्धिजीवि । उगु बहस ज्याझ्वलय् प्रधानमन्त्रीजुं ‘ढाले याना बी’ धकाः आलोचकतय्त प्रमजुं बिउगु हाँकयात कयाः बुद्धिजीवितय्सं न्ह्यसः थनी ।

‘प्रधानमन्त्री पदय् च्वनाच्वंम्हेसिनं थज्याःगु निम्नस्तरया भाय् छ्यलेगु ल्वःला ?’ प्रधानमन्त्रीया प्रेस सल्लाहकारं उकिया लिसः बी ‘प्रधानमन्त्रीं छ्यःगु खँग्वःयात मखु, आशययात थुइकेमाः । शब्दया अनेक अर्थ दइ । थुइकेगु आशययात खः । प्रधानमन्त्रीं बुद्धिजीवितय्त ‘जिं माःगु खँ थुइका बी’ धाःगु खः । थुकी अनावश्यक विवाद, बहस याना च्वनेमाःगु मदु ।’

प्रेस सल्लाहकारं प्रधानमन्त्रीजुया बचाउ याइ । तर उम्ह प्रेस सल्लाहकारं हे प्रधानमन्त्रीजुयात निराधार खँय् आलोचना यायेगु विना प्रमाण लाक्वपाक्व धायेगु प्रवृत्ति खने दयाच्वंगु दु । थ्व निन्दनीय खः प्रेस सल्लाहकां बुद्धिजीवितय्त न्याकी । प्रेस सल्लाहकारया खँ न्यने । प्रधानमन्त्रीजुया भाषण, भाषा थुइकेत सामान्य शब्दकोषया लिधंसा कयां जक मगाः खनिं ।

न्हूगु आशय कोषया नं आवश्यक जुइ । गन ‘ढले याना बी’या आशय थुइका बी । अर्थ छ्याना तइ ।प्रधानमन्त्री केपी ओलीया ‘ढले’ यानाबी, अभिव्यक्ति न्यने । कांग्रेसया सभापति शेरबहादुर देउवा नं लुमनी । देउवाया थीथी अन्तर्वार्ता न्यने । अन्तर्वार्ताय् न्ह्यसः तइपिंत देउवां ‘सुम्क च्वं’, ‘अप्वः हालेमते’ धकाः तुच्छ वचन ल्हाःगु लुमनी ।

शायद थज्याःगु अशोभनीय बोलीयात वय्कःया आशयशास्त्रं थुकथं बचाउ याइ । व मसिउ । तर थ्व चरित्र अहंकारी प्रवृत्तिया द्योतक खः । उकी शंका मदु । धाइ । देशय् थौं प्रजातन्त्र वल । निरंकुशताया अन्त्य जुइ । मानवअधिकारप्रति सचेतना वृद्धि जुइ । प्रधानमन्त्रीजुपिंसं नं थःथःगु धापू, भाय्या सन्तुष्टि काःगु जुइ ।वय्कःपिनि आशयशास्त्र ब्वनाः, थुइकाः जनतां म्हुतुप्वाः तिनाच्वनेमाः । मेगु छु याये फइ !

सम्बन्धित बुखँ

LEAVE YOUR COMMENTS