लोकंह्वाना वनाच्वंगु कला नगरी

विश्व कला परिषदं यल महानगरपालिकायात विश्वया स्वीन्यागूगु कला नगरीया रुपय् घोषणा यायेवं स्थानीय हस्तकलायात ल्यंका तयेत थीथी व्यापारिक संघसंस्था सक्रिय जूगु दु । यल जिल्लायात कला नगरी (क्राफ्ट सिटी) घोषणा याःगु लसताय् स्थानीय कला, सम्पदाया संरक्षणया निंतिं इपिं क्रियाशील जूगु खः ।

उगु क्षेत्रय् दुगु प्राचीन मौलिक व परम्परागत कला विकास जूगु लिधंसाय् विश्व कला परिषदं उगु सहरयात कला नगरी घोषणा याःगु खः । नेपाल हस्तकला महासंघं वंगु शुक्रवाः जक थःगु ४६ क्वःगु वार्षिकोत्सव व न्हय्क्वःगु हस्तकला दिवसतकं उगु नगरी न्यायेकल ।
सिद्धिनरसिंह मल्ल, श्रीनिवास मल्ल व योगनरेन्द्र मल्लया पालय् यल लाय्कू १६ गू व १७ गू शताब्दी निर्माण जूगु खः ।

यल–२० स्थित पिम्बहाः पुखू १२ गू शताब्दीया उपलब्धि खः । उगु पुखू जुजु महाराजं मखसे छम्ह राक्षसं निर्माण याःगु विश्वास यानातःगु दु । स्थानीय लुँहिति, कृष्ण द्यःया देगः प्राचीन कला व कौशलपाखें निर्माण यानातःगु मेगु महत्वपूर्ण सम्पदास्थल खः । स्वसः दँ न्ह्यवंनिसें न्ह्यानाच्वंगु पायाः जात्रा (खड्ग जात्रां २४ दँ न्ह्यःनिसें दिना वयाच्वंगुलिइ वंगु असोजय् हाकनं संचालन याःगु खः ।

वाङ्मय शताब्दी पुरुष सत्यमोहन जोशीया गृहनगर थ्व क्षेत्रय् मूवंगु अमूर्त संस्कृति व कौशलपूर्ण ल्हातं सिर्जना यानातःगु कलात्मक वस्तु, क्वन्ति महाद्यःया देगः, चिचिग्वःगु चैत्य लगायतया सम्पदा दु । महानगरपालिका क्षेत्र दुने उत्पादन जूगु हस्तकलाया वस्तु गुणस्तरीयता कायम यानाः क्राफ्ट नगरीया उत्पादन अंकित स्टिकर तिका मी फत धाःसा थनया उत्पादनं उच्च मूल्य प्राप्त याये फइगु विश्वास यानातःगु दु ।

वाङमय शताब्दी पुरुष जोशीं यल कला नगरीं स्वनिगलय् जक मखसे मुक्क देय्या हे गौरव थकायेगु ज्या याःगु धासें नेपाःया विविध कलां हे देय्यात अन्तर्राष्ट्रियस्तरय् म्हसीका बीत सफल जूगु धयादिल । स्वंगूगु शताब्दीइ मौर्य सम्राट अशोकं दयेके बिउगु सत्य, त्रेता, द्वापर व कलियुग पिज्वइगु प्यंगू स्तूप यलय् दु ।

अथे हे न्यागूगु शताब्दीइ दयेकूगु हिरण्यवर्ण महाविहार पुरातात्विक महत्वया सम्पदा खः । थुकियात १२ गू शताब्दीइ भाष्करदेवं जीर्णोद्वारयाःगु इतिहास दु । बुंगद्यःया जात्रा परम्परा नरेन्द्रदेवं शुरु याःगुलिइ थौंतक नं निरन्तर न्ह्यानाच्वंगु दु । कला नगरी घोषणालिसें थज्याःगु अमूर्त संस्कृति व परम्परायात संरक्षण व संवद्र्धन यायेमाःगु हाथ्या नं दु ।

महानगरया आपालं थासय् थीथीकथंया हस्तकलाया मुख्य क्षेत्र दु । काष्ठकला, मूर्तिकला, थांका लगायतया कलाय् स्थानीयवासी पुस्तौंपुस्ता न्ह्यवंनिसें लगे जुया वयाच्वंगु दु । यलय् त्वाःपतिकं बिस्कं बिस्कं कथंया हस्तकला खंके फइ । परिषद् विश्वन्यंकं न्यनाच्वंगु प्राचीन कलाया संरक्षण व प्रवद्र्धन यायेत नीस्वनातःगु संस खः ।

संयुक्त अधिराज्यय् केन्द्रीय ज्याकू दुगु थ्व परिषदं थीथी चरणय् अध्ययन यानाः सहरयात ‘कला नगरी’ घोषणा याना वयाच्वंगु दु । परिषद्या पदाधिकारीं महानगरपालिकाया थीथी थासय् चाःहिलाः थनया मौलिकताया बारे अध्ययन याःगु खः । एशिया प्रशान्त क्षेत्रया अध्यक्ष डा. घादा हिज्जाबी कदामिं वंगु कात्तिक २८ गते उगु महानगरपालिकाया प्रमुख चिरिबाबु महर्जनयात ‘कला नगरी’या दसिपौ लःल्हानादीगु खः ।

वयां लिपा उगु क्षेत्रया थीथी संघसंस्थां दिपावली यानाः लसता हंगु खः । कला नगरी घोषणां यलया नापनापं मुक्कं नेपाःया पर्यटन विकासया लिसें सांस्कृतिक पर्यटनया नं प्रवद्र्धन जुइ । स्थानीय हस्तकला उद्यमीं गु उत्पादनयात गुकथं गुणस्तरीय व कलात्मक दयेकेगु धइगु बारे प्रतिस्पर्धा यायेगु जुया वयाच्वंगु नेपाल हस्तकला महासंघया अध्यक्ष धर्मराज शाक्यं जानकारी बियादिल ।

यल लाय्कू लागा जक विश्व सम्पदाया धलखय् दुथ्याना वयाच्वंगुलिइ आः मेमेगु प्राचीन महत्वया सम्पदा व पुरातात्विकस्थलयात नं विश्व सम्पदाया धलखय् दुथ्याकेत माःगु वातावरण प्राप्त जूगु महानगरं न्ह्यथंगु दु । करिब प्यंगू लाख जनसंख्या दुगु महानगरपालिकाय् ८० प्रतिशत नागरिक हस्तकलाय् संलग्न जुयाच्वंगु दु । महानगरं स्थानीय हस्तकलायात अन्तर्राष्ट्रिय बजारय् प्रवद्र्धन यायेत विश्वया सरोकारवाला पक्षनापं तकं सहकार्य अप्वयेका वनेगु महानगर प्रमुख महर्जनं कनादिल ।

सम्बन्धित बुखँ

LEAVE YOUR COMMENTS