थिमिया भैलः प्याखं शुरु

थिमि (नेपालभाषा टाइम्स)- थनया मल्लकालीन तान्त्रिक भैलः प्याखं वंगु शनिवाःनिसें शुरु जूगु दु । थ्यंमथ्यं पीन्यादँ तक बन्द जुयाः लोपोन्मुख जुइगु अवस्थाय् थ्यनेधुंकूगु प्याखं स्थानीयतय् पहलय् हाकनं शुरु जूगु खः । शुक्रवाः बहनि ८ ताः इलय् मध्यपुर थिमिया लाय्कुलिं पिहां वयाः बालकुमारी देगः न्ह्यःने प्याखं क्यंगु खः ।

उगु इलय् मध्यपुर थिमि नगरपालिकाया ब्वनाय् झायादीम्ह उपराष्ट्रपति नन्दबहादुर पुननं उगु ऐतिहासिक तान्त्रिक भैलः प्याखं अवलोकन यानादीगु खः । नगरपालिकाया ब्वनाय् प्याखं स्वयेत झायादीम्ह उपराष्ट्रपति पुनं घौछितक प्याखं स्वयादीगु खः । न्हापां दबुलिइ च्वनाः प्याखं स्वयादीम्ह उपराष्ट्रपति पुन लिपा दबुलिं कुहां वयाः हे प्याखं स्वयादीगु खः ।

गुंपुन्हिया कन्हय्कुन्हुनिसें प्यचातक थिमिया थीथी त्वालय् लाय्कू भैलः प्याखं क्यनेमाःगु परम्परा दु । लाय्कू भैलःलिसें थुगुसी दिगु त्वालय् महाकाली, बोडेय् नीलबाराही, इन्द्र अप्सरा, भस्मासुर व अष्टमातृकाया गंप्याखं नं क्यनाच्वंगु दु ।

कोरोना भाइरस संक्रमणया कारणं निदँ संचालन याये मफुसां व स्वयां न्ह्यः स्थानीय ल्याय्म्हतय् सक्रियताय् थ्व प्याखं हाकनं संचालन याःगु खः । धाः बाजनय् ३२ गू तालय् हुइकीगु थ्व प्याखं थीथी त्वालय् धाःसा निगू निसें स्वंगू तालय् जक प्याखं क्यनेगु याना वयाच्वंगु दु । उकीमध्ये थिमिया नासः द्यःया न्ह्यःने थ्व प्याखं अनिवार्य रुपं क्यनेमाः ।

थ्व हे झ्वलय् प्याखंया प्रवद्र्धन यायेगु नापं आन्तरिक व बाह्य पर्यटक दुकायेगु ल्याखं मध्यपुर पर्यटन विकास व प्रवद्र्धन फोरम नं गठन याःगु दु । फोरमं संस्कृति, पर्यटन तथा नागरिक उड्डयन मन्त्री, सामान्य प्रशासन मन्त्री बागमति प्रदेशया पर्यटन मन्त्री लगायतयात नं प्याखं स्वयेत औपचारिक रुपं ब्वंगु दु ।

सम्बन्धित बुखँ

LEAVE YOUR COMMENTS