शेयर बजाः कुहां वंगुलिं लगानीकर्तात अर्थमन्त्री खनाः तंम्वल
येँ – शेयर बजाः न्हियान्हिथं कुहां वनेगु सुरु जुइवं लगानीकर्तात अर्थमन्त्री खनाः तम्वःगु दु । न्हियान्हिथं कुहां वनाच्वंगु नेप्से परिसुचक सोमवाः जक १६.१८ अंकं कुहां वंगु खः । थुकिया लिसें छवाः दुने ४६ अंकं नेप्से कुहां वनेवं लगानीकर्ता अर्थमन्त्री युवराज खतिवडा खनाः झन तम्वया वःगु खः ।
लगानीकर्तातय्सं अर्थमन्त्रीं करय् नियन्त्रण यायेमफुगुलिं शेयर बजाः बांमलाक प्रभावित जूगु द्वपं बियाच्वंगु दु । करय् खनेदुगु समस्याया कारणं लगानीकर्तात शेयरय् लगानी यायेत ग्यानाच्वंगु दु । उकिसनं अर्थमन्त्री खतिवडा शेयर बजाः प्रति सकारात्मक मदुगु द्वपं लगानीकर्तातय् दु ।
लगानीकर्तातय् संगठन नेपाल इन्भेस्टर फोरमया महासचिव राजन लम्सालं अर्थमन्त्री शेयर बजाःप्रति सकारात्मक मदुगुलिं हे लगानीकर्तात हतोत्साहित जुयाच्वंगु खँ धयादीगु दु । शेयर बजाः बांमलाक कुहां वनाच्वनं नं सरोकारवाला निकायपाखें बजार बल्लाकेगु निंतिं छुं हे पहल मयाःगु खँ न्ह्यथँसें लगानीकर्तातय्सं धयाच्वंगु दु, ‘थुकिं हे क्यँ अर्थमन्त्रीया शेयर बजाःप्रति गज्याःगु बिचाः दु धयागु खँ ।’
सोमवाः बजाः कुहां बन्द जूबलय् तक नेप्से परिसूचक ११२३.८३ अंकय् थ्यंगु दु । थ्व अंकं शेयरब जाः खुला न्ह्यवया अवस्थाय् थ्यंकूगु
क्यंगु दु । वंगु फागुन २५ गते निसें बजाः छुं भचा थहां वंगु खःसा न्हूगु आर्थिक दँ सुरु जुइधुंकाः बजाः झन झन कुहां वनाच्वंगु दु । थुकिया कारण कर व मेमेगु आर्थिक क्षेत्रय् लानाच्वंगु नकारात्मक प्रभाव हे खः धयागु विश्लेषण शेयर विश्लेषकतय् दु ।
अथेहे थौंकन्हय् बजाः तीव्रगतिं कुहां वनाच्वंगु मेगु कारण सम्पत्ति सुद्धिकरण सम्बन्धि निर्देशिका कार्यान्वयनय् वयेगु तयारी जुयाच्वंगुलिं व जिम्मेवार सरकारी अधिकारीपाखें हाकुगु धन सम्बन्धी अभिव्यक्ति वयाच्वंगुलिं नं खः धाःगु दु ।
LEAVE YOUR COMMENTS