खाता चायेका मबीकं मोहनीयात टिकट ममीगु

येँ – सरकारं यातायात ख्यलय् सिन्डिकेट त्वाःथलेगु झ्वलय् यातायात समितितय् बंैक खाता रोक्का यानातःगु आः तुरन्त मचालीगु जूगु दु । यातायात व्यवस्था विभागं रोक्का यानातःगु खाता चायेकेगु बारे छुं प्रक्रिया मन्ह्याःनिगु खँ धाःगु दु ।मोहनीया निंतिं टिकट बुकिङ्ग सुरु याये न्ह्यः समितितय् खाता चायेकाबी धकाः वयाच्वंगु खँ हल्ला जक जूगु खँ विभागया महानिर्देशक लावन्यकुमार ढकालं राससयात कनादीगु दु ।

वय्कःया कथं नवीकरण हे मजूनिगु संस्थाया खाता चायेके मिले मजू । ‘उकिं समितिं कम्पनीइ वनागु प्रमाण ज्वनावल धाःसा जक प्रक्रिया न्ह्याकेफइ’ वय्कलं धयादीगु दु । वय्कलं कम्पनीइ वनेधुंकूगु समितिया खाता चायेका बीत प्रधानमन्त्री नं निर्देशन बीधुंकूगु खँ नं धयादीगु दु ।

संघसंस्था दर्ता ऐन कथं सामाजिक ज्या यायेगु उद्देश्य तयाः समिति चायेकाः व्यापार याःगु धासें विभागं चैत १८ गते न्हूगु निर्देशिका जारी यानाः यातायात समिति नवीकरण मयायेगु क्वःछिउगु खः । थुकिया लिसें विभागं थज्याःगु समितितय् खाता नं रोक्का यानाबिउगु खः । आः विभागं वइगु पुस तकया दुने कम्पनी दर्ता यायेत म्याद तोके याःगु दु ।

मेखे नेपाल यातायात व्यवसायी राष्ट्रिय महासंघं समितितय् खाता चायेको मबीकं मोहनीया निंतिं अग्रिम बुकिङ्ग मयायेगु खँ धयादीगु दु । ‘खाता चायेका मबिल धाःसा ध्यबा गन तयेगु ? ’ धयागु न्ह्यसः तयादिसें वय्कलं खाता चायेको मबिइकं टिकट नं चालीमखु धयादीगु दु ।

अथेहे वय्कलं पेट्रोलया भाः तःक्वः थहां वनेधुंकूगु धासें थुकथं बस भाडा नं समायोजन यायेत नं इनाप यानादीगु दु ।महासंघं ३०७ गू समिति आवद्ध जुयाच्वंगु दु । विभागं थुकि आवद्ध जूगु २४५ गू समितिया बैंक खाता रोक्का यानातःगु दु । मेमेगु समितिया खाता सहकारीइ चायेकातःगुलिं उमिगु खाता धाःसा बन्द जूगु मदुनि

सम्बन्धित बुखँ

LEAVE YOUR COMMENTS