बहुस्वामित्वया छेँयात नं अनुदान
राष्ट्रिय पुनःनिर्माण प्राधिकरणं बहुस्वामित्व दुगु छेँय् गुलि परिवार च्वनाच्वंगु खः, उलि हे लाभग्राही माने यानाः अनुदान बीगु जूगु दु । स्वनिगःया स्वंगुलिं जिल्लाया नगर क्षेत्रय् बहुस्वामित्वया छेँखाया पुनःनिर्माण न्ह्याः वने मफयेवं कार्यकारी समितिं थज्याःगु निर्णय याःगु खः ।
थ्व स्वयां न्ह्यः प्राधिकरणं छखा छेँय् न्ह्याक्व परिवार च्वनाच्वंगु जूसां नं छम्हेसिया नाप जक अनुदान सम्झौता याना वयाच्वंगु खः । थ्व निर्णय लिपा छखा छेँय् च्वनाच्वंपिं निम्ह वा व स्वयां अप्वः परिवारमध्ये सकसियां नापं बिस्कं बिस्कं अनुदान सम्झौता जुइगु प्रमुख कार्यकारी अधिकृत सुशील ज्ञवालीं कनादिल ।
वय्कलं धयादिल, ‘अपार्टमेन्टया रुपय् माने यानाः गुलि परिवार च्वनीगु खः, उलियात हे अनुदान बी त्यनागु खः ।’वि.सं. २०७२ या बैशाखय् भुखाय् ब्वये स्वयां न्ह्यः हे अंशबन्डा जुइधुंकूपिनिगु हकय् प्राधिकरणं थज्याःगु निर्णय याःगु खः । स्थानीय तहया सिफारिसया लिधंसाय् इपिं नापं अनुदान सम्झौता यायेगु वय्कलं कनादिल ।
वय्कलं धयादिल, ‘मालपोतय् वनाः कानुनी रुपय् अंशबन्डा यानाः छुटे जुयाः च्वंपिं जक मखु व्यावहारिक रुपं नं छुटे जुयाच्वंपिनिगु हकय् नं थ्व लागू जुइ ।’कानूनी रुपय् जक मखसे व्यावहारिक रुपय् नं छुटे जुयाच्वंपिं निम्ह वा व स्वयां अप्वः दाजुकिजाया छेँ दुगु दुसा इपिं सकसियां नाप बिस्कं बिस्कं अनुदान सम्झौता जुइ ।
सहरी क्षेत्रय् स्वयां नं थुकथंया समस्या ग्रामिण क्षेत्रय् खने दयाच्वंगु प्राधिकरणं न्ह्यथंगु दु । परम्परागत बस्तीइ चिधंगु क्षेत्रफलय् दयेकातःगु छेँ एकीकृत रुपय् दयेकेत प्राधिकरणं प्रेरित यानाच्वंगु दु । १÷१ आनाय् निखा÷स्वखा तक छेँ दयेकातःगु दु धइगु खःसा उकियात छखा हे छेँ दयेकाः छगू स्वयां अप्वः परिवार च्वनेत प्राधिकरणं स्थानीयवासीयात धया वयाच्वंगु खः ।
प्रमुख कार्यकारी अधिकृत ज्ञवालीं धयादिल, ‘स्वम्हेसिया १÷१ आनाय् छेँ दयेकेगु स्वयां ३ आनाय् छेँ दयेकाः छगू छगू तल्ला प्रयोग याये फइ ।’बहुस्वामित्वया विषयय् वा बिस्कं बिस्कं छेँइ् च्वनाः नं कानूनी रुपय् बिस्कं च्वना मच्वंपिं दाजुकिजापिनिगु हकय् स्थानीय तहं सही सिफारिस यायेमाःगु खँय् ज्ञवालीं बः बियादीगु दु ।
वय्कलं थुलि नं फ्यासुकेगु ज्या मजुल धाःसा पीडित झन् पीडाय् लाइगु व फ्यासुकेबलय् सरकारया ध्यबा वनीगु ला खःनि धकाः दुरुपयोग यायेगु न्हापाया परम्परायात अन्त्य यानाः वास्तविक पीडितयात सिफारिस यायेत नं स्थानीय तहयात इनाप यानादिल । भुखाय् ब्वःगु प्यदँ थ्यने त्ययेकाः तकं निजी आवासया पुनःनिर्माण सुस्त दु ।
पिनेया जिल्लाय् स्वयां नं स्वनिगलय् निजी आवास निर्माणं गति काये फयाच्वंगु मदुनि । स्वनिगलय् दकलय् तःधंगु समस्याया रुपय् बहुस्वामित्वया छेँ दुगु जनप्रतिनिधिं धया वयाच्वंगु दु । स्वनिगलय् दुगु नीछगू स्थानीय तहमध्येय् नं ग्रामिण वडाय् स्वयां नगर क्षेत्रय् पुनःनिर्माणया ज्या सुस्त दु ।
राष्ट्रिय पुनःनिर्माण प्राधिकरणं भुखाय् ब्वःगु लगत्तैनिसें आतकया दुने गुंगू लाख ग्वीखुद्वः न्यासः व चय्निद्वखा छेँया सर्वेक्षण याःगु खः । उकीमध्ये प्रबलीकरणय् लाःगु लाभग्राही ६९,८९१ दु । प्राधिकरणय् दर्ता जूगु कुल गुनासो निगू लाख स्वीन्हय्द्वः चय्न्यागू दुगुलिइ फछ्र्यौट जूगु निगू लाख न्याद्वः न्यासः व चय्प्यंगू दु ।
भुखाचं प्रभावित जिल्लाया च्यागू लाख नीनिद्वः न्हय्सः व झिंगुम्ह लाभग्राही धलखय् लाःगु दु । उकीमध्ये न्हय्गू लाख स्वीच्याद्वः न्यासः व नीस्वम्हलिसे अनुदान सम्झौता सम्पन्न जुइधुंकूगु दु । प्राधिकरणं न्हय्गू लाख स्वीछद्वः प्यसः व पीछम्हेसित न्हापांगु किस्ता वितरण यायेधुंकूगु दु ।
अथे हे न्यागू लाख नीछद्वः प्यसः स्वीछम्हेसित निगूगु किस्ता व स्वंगू लाख स्वीछद्वः न्यासः व पीस्वम्ह लाभग्राहीयात स्वंगूगु किस्ता वितरण यायेधुंकूगु दु । प्राधिकरणया तथ्यांककथं खुगू लाख खुद्वः व ग्वीन्याखा छेँ निर्माण जुयाच्वंगु दु । स्वंगू लाख पीन्हय्द्वः स्वसः व झिंछम्ह लाभग्राहीं छेँ दने सिधयेकेधुंकूगु प्राधिकरणं न्ह्यथंगु दु ।
LEAVE YOUR COMMENTS