प्रधानमन्त्री ओलीया चीन भ्रमण, छुं न्हूगु सम्झौता मजुइगु

येँ (नेपालभाषा टाइम्स)- प्रधानमन्त्री केपी शर्मा ओली चीनया भ्रमणया निंतिं उखेपाखे झाःगु दु । प्रधानमन्त्री ओलीया थ्व भ्रमण विशेष रुपं चिनिया परियोजना बेल्ट एण्ड रोड इनिसेटिभ (बिआरआई) सम्झौता बारे छु जुइ धयागु चर्चा जुयाच्वंगु दु । कांग्रेसं न्हापा हे बिआरआई अन्तर्गत त्यासा कयाः नेपालय् परियोजना न्ह्याकेमखु धकाः निर्णय यानातयेधुंकूगु सत्तारुढ निगू दल कांग्रेस व एमाले दथुइ प्रधानमन्त्री ओलीया भ्रमणया इलय् बिआरआईयात कयाः विवाद ब्वलंगु खः ।

थ्व विवादयात ज्यंके कथं ओलीया भ्रमण छन्हु न्ह्यः निगू दल दथुइ ‘बिआरआई सहकार्य फ्रेमवर्क’ नामं छगू सहमति ला जूगु दु, तर थ्व सहमतिइ त्यासा कायेगु कि मकायेगु धयागु छुं खँ धाःसा उल्लेख यानातःगु मदु । थ्व हे कारणं प्रधानमन्त्री ओलीया थ्व भ्रमणया इलय् छुं कथंया चिनिया ग्वाहालियात कयाः सम्झौता मजुइगु सीदुगु दु । थथे सम्झौता मजुइगु जूगुलिं हे प्रधानमन्त्रीया भ्रमण पुचलं सुं नं मन्त्री दुमथ्याःगु खँ धाःगु दु ।

प्रधानमन्त्री ओली हिमालयन एयरलाइन्सया चार्टर विमानपाखें ७८ म्हेसिया ‘जम्बो’ पुचः ज्वनाः चीन वंसां थुगु भ्रमण पुचलय् परराष्ट्रमन्त्री छम्ह बाहेक सुं नं मन्त्री दुमथ्याःगु खः ।

बिआरआईया कार्यान्वयनय् त्यासा कायेगु कि मकायेगु धयागु विवाद जुयाच्वंगु इलय् चिनियाँ विज्ञतय्सं धाःसा अनुदानं जक बिआरआई कार्यान्वयन जुइगु सम्भावना मदुगु खँ धयाहःगु दु । चिनियाँ विज्ञतय्सं बिआरआई ‘चन्दा’ बीगु परियोजना मखु धकाः तप्यंक हे धाःगु दु । चीनया हुबे युनिभर्सिटी अफ इकोनोमिक्स एन्ड बिजनेशया नेपाल केन्द्रया निर्देशक प्राध्यापक झाङ सुबिनं बिबिसीलिसे खँ ल्हासें धाःगु दु, ‘बिआरआईया फुक्क परियोजना त्यासा मखसे अनुदानय् दयेकेगु जुल धाःसा बिआरआई धयागु हे ‘चन्दा’ जुइगु जुल नि । बिआरआई धयागु चन्दा मखु ।’

चिनियाँ विज्ञतय्सं बिआरआई ‘चन्दा’ धयाच्वंसां प्रधानमन्त्रीया भ्रमणया तयारीया निंतिं न्ह्यः हे चीन थ्यंम्ह परराष्ट्र मन्त्री आरजु राणां धाःसा थः समकक्षी वाङ यीयात नेपाः आः छुं नं कथंया त्यासा कायेगु अवस्थाय् मदु, उकिं अनुदान दइ धयागु आशा याना’ धकाः धया वयेधुंकूगु दु ।
उकिं आः प्रधानमन्त्रीया भ्रमणया इलय् न्हापा जूगु सम्झौता कार्यान्वयनयात कयाः जक सहलह जुइगु, छुं नं कथंया न्हूगु सम्झौता मजुइगु खँ सीदुगु दु ।

अथे खःसां भ्रमणया इलय् न्हूगु परियोजना कथं टोखा–खहरे सुरुङ मार्ग, किमाथाङका–खाँदबारी सतकमार्ग, छुं बन्दरगाह विस्तारया ज्या स्वनिगःया प्रशारण लाइन स्तरोन्नति, मदन भण्डारी विश्वविद्यालय आदि धकाः न्ह्यःने यंकीगु जूगु दु । थुकिया लिसें न्हापा हे घोषणा जुइधुंकूगु चक्रपथया निगूगु चरणया विस्तार, हिल्सा सिमिकोट सतकमार्ग, अरनिको राजमार्ग स्तरोन्नतिया ज्या गुकथं न्ह्याकेगु धयागु बारे सहलह जुइगु खँ धाःगु दु ।