मोदी छगू हे कार्यकालय् स्वक्वः नेपाः भ्रमणय्

येँ – भारतीय प्रधानमन्त्री नरेन्द्र मोदी भारतया अज्याःम्ह न्हापांम्ह प्रधानमन्त्री जुयादीत्यंगु दु गुम्हेस्यां थःगु छगू हे कार्यकालय् स्वक्वः तक नेपाः भ्रमण यानादिल । भारतीय प्रम नरेन्द्र मोदी थःगु स्वक्वःगु नेपाः भ्रमणया लागिं थ्वहे वइगु वैशाख २८ गते जनकपुर झायेत्यंगु दु । वय्कः जनकपुरं मुक्तिनाथं व मुक्तिनाथं वकुन्हु हे सनिलय् येँय् झायादी ।

२९ गते स्वदेश लिहां झाइ ।भारतय् वय्कः स्वयां न्ह्यःयाम्ह प्रधानमन्त्री मनमोहन सिंह निगू कार्यकाल तक पदय् च्वनादिल तर नेपाः धाःसा छक्वः हे मवः । १७ दँ तक भारतया सुं हे प्रधानमन्त्रीं नेपाःया भ्रमण मयाःगु इतिहास दु । थज्याःगु इतिहासयात तोडे याःम्ह प्रधानमन्त्री नरेन्द्र मोदीं धाःसा छगू हे कार्यकालय् स्वक्वः तक नेपाः भ्रमण यानाः मेगु इतिहास तयादीत्यंगु दु ।

वय्कलं यानादीत्यंगु स्वक्वःगु भ्रमण ला नेपाःया प्रधानमन्त्रीं भारत भ्रमण याःगुयां लछि लिपा हे जुइत्यंगु दु । कुटनीतिया ख्यलय् छुं नं देशया प्रधानमन्त्रीं लछि हे मदुनिवं थथे ‘रिटर्न भिजिट’ याइगुयात नं अर्थपूर्ण हे तायेकी । आखिर प्रधानमन्त्री नरेन्द्र मोदीं थथे स्वक्वः स्वक्वःमछि नेपाः भ्रमण छाय् यानादीत्यन ले ? थ्व धाःसा नेपाःया कुटनीतिक ख्यलय् आः दकलय् चर्चाया विषय जुयाच्वंगु दु ।

अझ गुलिसिनं ला वय्कलं थुलि याकनं नेपाः भ्रमण यायेमाःगु आवश्यकता हे जकं दुगु खः लाकि मखु धइगु न्ह्यसः तकं तया हःगु दु । अनुभवी कुटनीतिज्ञतय्सं धाः कथं थ्व इलय् भारतया प्रधानमन्त्री व नेपाःया प्रधानमन्त्री दथुइ तत्काल याये धकाः लिखित रुपं वयाच्वंगु ज्या ला छुं नं मदु । तर वय्कःपिनि दथुइ जूगु ‘वन–टु–वन’ वार्ताय् आपालं ज्याखँ यायेगु सहमति जूगु दु । सम्भवतः अज्याःगु सहमतित पूवंकेगु लागिं भारतीय प्रधानमन्त्री थुलि याकनं नेपाः वयेत्यंगु खयेफु ।

अथे हे थौंकन्हय् भारतय् मोदीया सरकारयात जःलाखःलालिसे स्वापू स्यंकल धइगु तःधंगु द्वपं दु । अज्याःगु द्वपं हुया छ्वयेगु लागिं नं वय्कः नेपाः वयेत्यंगु जुइफु । आकिवं भारतय् चुनाव नं जुइत्यंगु दु । उकियात नं थुकिं ग्वाहालि हे याइगु विश्लेषण छगू पक्षया दु । ‘रामया ससः’ नगरया भ्रमणं वय्कःया हिन्दूवादी भोट अझ सुरक्षित जुइगु अनुमान नं याना हःगु दु ।