संघ प्रदेश विवाद ज्यंकेत कार्यदल

येँ – संघ व प्रदेश दथुइ ब्वलनाच्वंगु विवाद समाधान यायेगु निंतिं गृहमन्त्री रामबहादुर थापाया संयोजकत्वय् खुम्ह दुजः दुगु उच्चस्तरीय कार्यदल दयेकूगु दु । थ्व कार्यदलय् संघ व प्रदेश दथुइ दयाच्वंगु राजनीतिक, कानुनी व आर्थिक लगायतया विषयय् दयाच्वंगु विवादबारे प्रतिवेदन दयेकीगु खँ धाःगु दु ।प्रधानमन्त्री तथा मन्त्रिपरिषद कार्यालयय् सोमवाः च्वंगु अन्तर प्रदेश परिषदया न्हापांगु बैठकं थ्व कार्यदल गठन याःगु खः ।

अन्तर प्रदेश बैठक आइतवाः निसें न्ह्याःगु खः । थ्व कार्यदलं वइगु पुस ३ गते दुने प्रतिवेदन बुझे यायेमाःगु खँ सरकारया प्रवक्ता सुचना मन्त्री गोकुलप्रसाद बाँस्कोटां धयादीगु दु ।कार्यदलय् अर्थमन्त्री डा. युवराज खतिवडा, संघीय मामिला तथा सामान्य प्रशासनमन्त्री लालबाबु पण्डित, प्रदेश नं. २ या मुख्यमन्त्री लालबाबु राउत, प्रदेश नं. ५ या मुख्यमन्त्री शंकर पोखरेल दुथ्याःगु दु ।

कार्यादलया सदस्य सचिवय् मुख्यसचिव लोकदर्शन रेग्मीयात तःगु दु ।थौंकन्हय् प्रदेश– प्रदेश दथुइ, प्रदेश व संघ दथुइ संविधान, कानुन, बजेट, नीति तथा कार्यक्रमया कार्यान्वयन व अधिकारया बाँडफाँट थें ज्याःगु खँय् विवाद जुयाच्वंगु दु ।