
येँ – सरकारया महात्वाकांक्षी कार्यक्रम नेपाल भ्रमण वर्ष वयेत स्वला ति जक ल्यं दनिबलय् पर्यटन व्यवसायीत हे थ्व कार्यक्रम सफल जुइगु खँय् संशंकित खनेदुगु दु । पर्यटन व्यवसायीतय्सं थ्व ज्याझ्वः सफल यायेगु निंतिं तःधंगु हाथ्यां ल्यंदनिगु खँ धयाच्वंगु दु । सरकारं तःधंगु कार्यक्रम धयाच्वंसां थुकिया निंतिं आवश्यक पूर्वाधार विकास जुइमफुगु व प्रचार प्रसार तकं बांलाक जुइमफुगुलिं पर्यटन व्यवसायीतय् थुकिया सफलताय् सशंकित जुयाच्वंगु खः ।
सरकारं नेपाल भ्रमण वर्षया झ्वलय् सन् २०२० य् नीगू लाख पर्यटक दुत हयेगु लक्ष्य तयातःगु दु । सरकारया उच्च पदस्थ कर्मचारीत नं थ्व लक्ष्य पूवंकेत तःधंगु हाथ्या दनिगु खँ धयाच्वंगु दु । उच्च पदास्थ कर्मचारीतय् कथं आःतकया स्थिति स्वयेबलय् १४–१५ लाख कर्मचारी अःपुक हे नेपाः दुहां वइगु खनेदु, ल्यंदुगु ५–६ लाख पर्यटक दुत हयेत धाःसा तःधंगु चुनौती दु ।
संस्कृति पर्यटन तथा नागरिक उड्डयन मन्त्रालयया सचिव केदार बहादुर अधिकारीं हे बिबिसी लिसे खँ ल्हासें न्यागू खुगू लाख पर्यटक हयेत अझं यक्व मेहनत यायेमानिगु खँ धयादीगु दु । वय्कलं धयादीगु दु, ‘आः झीथाय् आवेदन तयातःगु वायुसेवातय्त स्वीकृति बिल धाःसा थ्यंमथ्यं पौन दुई थाख थप पर्यटक वइगु खनेदु, गुकिं छुं भचा मगाःमगाः पूवनीगु खनेदु ।’
पर्यटन व्यवसायीतय्त धाःसा दकलय् मध्ये चुनौतीया विषयय् हे पर्यटकत दुहां वइगु मू थाय् त्रिभुवन विमानस्थलय् पूर्वाधार जुयाच्वंगु दु । सरकारं ज्वनाच्वंगु लक्ष्य कथं पर्यटक दुहांवल धाःसा त्रिभुवन विमानस्थलय् पर्यटकतय् सम्हालय् हे यायेफइमखु ।बिबिसीलिसे खँ ल्हासें पर्यटन व्यवसायी साजन शाक्यं धयादीगु दु, ‘सामान्य चाप दुबलय् हे विमानस्थल गुलि व्यवस्थित जुइमाःगु खः उलि मजू, पर्यटकत ह्वार्रर दुहां वल धाःसा गुकथं सम्हालय् याइगु जुइ ।’
वय्कःया कथं स्वनिगःया लँ तकं व्यवस्थित मदुसा प्रदूषण व ट्राफिकया कारणं नं पर्यटकतय्त उलि हे समस्या जुइगु खनेदु । सरकारी अधिकारीतय्सं धाःसा मनसुन क्वचायेवं सतक सुधार यायेगु निंतिं भौतिक पूर्वाधार तथा यातायात मन्त्रालयलिसे सहकार्य जुयाच्वंगु खँ धयादिल ।
अथेहे त्रिभुवन विमानस्थल मर्मत सम्भारया ज्या नं वइगु डिसेम्बर महिनाय् क्वचाइगु व भ्रमण वर्षयात लक्षित यानाः ज्या जूगुलिं २०२० या सुरु निसें हे समस्या मजुइगु दावी पर्यटन सचिवया दु । वय्कलं सन् २०२० या मार्च निसें भैरहवाय् च्वंगु गौतम बुद्ध अन्तर्राष्ट्रिय विमानस्थल नं संचालनय् वइगुलिं समस्या मजुइगु खँ धयादीगु दु ।
सचिव गौतमं भ्रमण वर्षया इलय् ‘काठमाडौं भ्याली बाइ नाइट’ नामं पर्यटकतय्त चान्हय् नं स्वनिगःया मू मू सम्पदास्थलय् चायेकेगु ज्याझ्वः दयेकाच्वनागु खँ धयादीगु दु । सरकारी लक्ष्य कथं २० लाख पर्यटक दुहां वल धाःसा आवासया समस्या धाःसा मजुइगु खँ पर्यटन व्यवसायीतय्सं धाःगु खः ।
थौंकन्हय् स्वनिगः लिसें देय्या थीथी थासय् होटलत न्ह्यथनेबह कथं अप्वया वनाच्वंगुलिं च्वनेगुलिइ धाःसा समस्या मजुइगु खँ धाःगु दु । स्वनिगलय् जक खुगुलिं मल्याक तःधंगु होटलय् संचालनय् वयेत्यंगु दुसा थुपिं अप्वः धयाथें अन्तर्राष्ट्रिय होटल लिसे आवद्ध जुयाच्वंगु दु ।
होटल एशोसियसन नेपालया महासचिव जुयाच्वनादीम्ह सनम शाक्यं धयादीगु दु, ‘स्वनिगलय् झीके २० लाख पर्यटक धाने यायेफुगु सामथ्र्य दु । होमस्टे, बेड एन्ड ब्रेकफास्ट उपलब्ध याकीगु होटल निसें तारे होटलया ल्याः अप्वःगु दु ।’ स्वनिगःया लिसें पोखरा व चितवनय् नं होटलतय् ल्याः अप्वया च्वंगु दु ।
थौंकन्हय् नेपालय् फाइभ स्टार होटलं १३० निसें १४० डलर तक व थ्रीस्टार होटलं ६० डलर तक कायेगु याना वयाच्वंगु दु । नेपाः दुहां वइपिं पर्यटकतय्सं गुलि खर्च याइ धयागु खँय् धाःसा सरकारी अधिकारी लिसें पर्यटन व्यवासायीतय् चिउताःया विषय जुयाच्वंगु दु ।
होटल एशोसियसनया महासचिव शाक्यं धयादीगु दु, ‘ठमेलय् ५० प्रतिशत छुट बिया च्वंगु इलय् नं डुनोट जक नयाः च्वनीपिं पर्यटकत वल धाःसा झीत छुं फायदा जुइमखु ।’सन् २०१८ या तथ्यांक कथं उबलय् पर्यटकतय्सं नेपालय् न्हि ४४ डलर खर्च याःगु खः, तर थ्वयां दछि न्ह्यव धाःसा ५४ डलर खर्च याःगु तथ्यांक दु ।
LEAVE YOUR COMMENTS