नेपाल इन्स्योरेन्स व आइएमई जनरल इन्स्यारेन्स दथुइ मर्जरया तयारी
येँ – आइएमई जनरल इन्स्योरेन्स कम्पनी व नेपाल इन्स्यारेन्स दथुइ मर्जर जुइगु तयारी जूगु दु । निगू बीमा कम्पनी मर्जया निंतिं गृहकार्य सुरु जूगु खँ धाःगु दु । आइएमइ जनरल आइएमइ समूहया मू लगानी दुगु बीमा कम्पनी खःसा नेपाल इन्स्यारेन्स आइएमइ समूहया प्रवद्र्धकतय् सेयर दुगु कम्पनी खः ।
आइएमइ जनरल इन्स्योरेन्सया आइतवाः जूगु साधारण सभां मर्जया निंतिं उपयुक्त कम्पनी ल्यया ज्या न्ह्याकेत संचालक समितियात अख्तियारी बिउगु दु । मेखे नेपाल इन्स्योरेन्स कम्पनीं नं मर्जया निंतिं अध्ययन यानाः सुझाव बीत छगू कमिटी गठन याःगु दु । समितिया सुझाव कथं साउनय् जुइगु साधारण सभाय् मर्जरया निंतिं विशेष प्रस्ताव यंकेगु तयारी कम्पनीं यानाच्वंगु दु ।
थ्व निगुलिं कम्पनीया प्रमोटरत छगू हे समूहयापिं अप्वः दुगु लिसें शेयर बजाःया मू, यानाच्वंगु व्यवसायया साइज बराबर धयाथें दुगुलिं यानाः निगू कम्पनी दथुइ मर्ज जुइत सहज जुइगु खँ धाःगु दु । मेखे आइतवाः जूगु आइएमइ जनरलया साधारण सभां ५ प्रतिशत बोनस शेयर बीगु प्रस्ताव नं पारित याःगु दु ।
निगुलिं कम्पनीया प्रमोटरत छगू हे समूहयापिं अप्वः दुगु लिसें शेयर बजाःया मू, यानाच्वंगु व्यवसायया साइज बराबर धयाथें दुगुलिं यानाः मर्ज जुइत सहज जुइगु
बोनस शेयर वयेवं कम्पनीया चुक्ता पुँजी १ अर्ब ५ करोड थ्यनी । नेपाल इन्स्योरेन्सं नं ७.५ प्रतिशत बोनस शेयर बीगु जूगु दु । थ्व बोनस शेयर लिपा नेपाल इन्स्योरेन्सया चुक्ता पुँजी १ अर्ब ९ करोड ५५ लाख थ्यनी । निगुलिं कम्पनी मर्ज जुइवं चुक्ता पुँजी २ अर्ब १४ करोड ५५ लाख थ्यनी ।
अथेहे निगुलिं कम्पनीं यानाच्वंगु व्यवसाय नं बराबर हे धयाथें खनेदुगु दु । चालु आर्थिक दँय् वंगु शुक्रवाः तक आइएमई जनरलं १ अर्ब २१ करोडया प्रिमियम संकलन याःगु दुसा नेपाल इन्स्यारेन्सं १ अर्ब १८ करोपया प्रिमियम संकलन याःगु दु । अथेहे आइतवाः शेयर बजारय् आइएमइया शेयरया प्रति कित्ता ३५४ तकां कारोवार जुलसा नेपाल इन्स्योरन्सया प्रति कित्ता ३५३ तका कारोवार जुल ।
थुपिं सुचकांकया ल्याखं निगू कम्पनीया स्वाप रेसियो बराबरी धयाथें जुइगुलिं मर्ज यायेत सहज जुइगु खँ धाःगु दु ।बीमा समितिं मर्जरयात प्रोत्साहित यायेगु नीति नालेधुंकाः निगूलिं कम्पनीं मर्जय् वनेगु निंतिं तयारी सुरु याःगु खः । निगू कम्पनीया सुचकांका आधारय् मर्ज जुइत सहज जूसां नांया खँय् धाःसा समस्या जुइफगु खँ धाःगु दु ।
नेपाल इन्स्योरेन्स नेपाःया न्हापांगु इन्स्योरेन्स कम्पनी खः । थ्व कम्पनीया बांलाःगु छवि व इतिहास दु । मेखे आइएमइ जनरल इन्स्योरेन्सं नं थःगु आइएमइ ब्राण्डया कारणं व्यवसायय् बांलाःगु सफलता चूलाका वयाच्वंगु दु । थ्वहे कारणं नामय् नं निगुलिं कम्पनीया नां वइकथं मर्ज जुइफुगु खँ धाःगु दु ।
LEAVE YOUR COMMENTS