ने. सं. ११४४ ञलाथ्व दशमी -

सछिम्हेसिनं ह्याउँगु पासपोर्ट लित मबिउ

लित मबिउगु ह्याउँगु पासपोर्ट निष्क्रिय

येँ पुलांपिं सांसदतय्सं लित मबिउगु ह्याउँगु पासपोर्टयात निष्क्रिय यानाबिउगु दु । थःगु सांसद पद क्वचाःसां सछिम्हति सांसादतय्सं अझं ह्याउँगु पासपोर्ट धाइगु कुटनीतिक राहदानि लित मबिसे तयातःगु खः । आः थ्व राहदानी फुक्कं निष्क्रिय यानाबियागु खँ संसद अधिकारीतय्सं धाःगु दु ।

संसद कानुन कथं संसदया कार्यकाल क्वचाःगु छवाः दुने थज्याःगु पासपोर्ट लिसें मेमेगु सामान लित बीमाः । तःक्वः ताकेता यानां नं सछिगूति पासपोर्ट लिहां मवयेवं दुरुपयोग जुइफु धकाः आः छ्यलेमजिका बियागु खँ संघीय संसदया प्रवक्ता भरतराज गौतमं बिबिसीयात धयादीगु दु ।

पदय् मदयेधुंकाः नं थज्याःगु पासपोर्ट ज्वनाः विदेश वन धाःसा कानुनी कारवाही न्ह्याकेफइगु खँ अध्यागमन विभागं धाःगु दु ।कुटनीतिक पासपोर्ट ज्वनाच्वंपिं मध्ये गुलिसितं थ्व पासपोर्टय् ताःईया निंतिं भिसा बियातःगुलिं नं लित मबिउगु खँ धाःगु दु । अध्यागमन विभागया महानिर्देशक दिपक काफ्ले थज्याःगु भिसा मेगु पासपोर्टय् सारे यायेत थःपिंसं पहल यानाच्वनागु खँ धयादीगु दु ।

कुटनीतिक राहदानी लित मबिउपिं मध्ये प्रमुख दलया हे तःम्ह नेतात दुगु खँ धाःगु दु । अध्यागमन विभागं थज्याःगु पासपोर्ट च्वनाः विदेश वनीपिंत पनेगु निंतिं विमानस्थल निसें सीमा नाकाय् कडा निगरानी तयाच्वनागु धाःगु दु । छुं ई न्ह्यव थज्याःगु हे पासपोर्ट ज्वनाः विदेश वनेत्यंपिं मिजंम्ह छम्ह व मिसाम्ह छम्ह सांसदयात विमानस्थलय् हे पासपोर्ट लित कयागु खँ अध्यागमन विभागं धाःगु दु ।