पाटन व वीर अस्पतालय् सीपिंतं कोराना मजूगु पुष्टि

येँ – सोमवाः यलया पाटन अस्पताल व वीर अस्पतालय् सीपिं निम्हेसित कोरोनाया संक्रमण मजूगु पुष्टि जूगु दु ।

मंगलवाः न्हिनय् पत्रकार सम्मेलन यासें स्वास्थय तथा जनसंख्या मन्त्रालयं सीपिं निम्हं कोरानाया कारणं मसीगु स्पष्ट याःगु खः । परिक्षण यायेगु निंतिं सोमवाः नमुना संकलन यानाः राष्ट्रिय जनस्वास्थ्य प्रयोगशाला टेकुइ छ्वःगु खः । परिक्षण लिपा निम्हेसियां लिच्व नेगेटिभ वःगु खः ।

कोरोनाया आशंकाय् अस्पताल भर्ना जुम्ह निम्हं सोमवाः अस्पतालय् सीगु खः । सोमवाः पाटनय् अस्पतालय् सीम्ह धादिङया खःसा वीर अस्पतालय् सीम्ह चन्द्रागिरी नगरपालिका संतुंगःया खः ।

उखे किपूली काेराेनाया थज्याःगु लक्षण खनाः साेमवाः अस्पताल भर्ना याःम्ह छम्ह मिसाया परिक्षणया रिपाेर्ट नं नेगेटिभ वःगु दु । दुबई नं लिहांवःम्ह २७दँया मिसयात छुं दिं लिपा ज्वर व मुसु वयेवं काेराेना शंका यानाः साेमवाः पाटन अस्पटालय् भर्ना याःगु खः । साेमवाः हे उम्ह मिसाया परिक्षण याःगु खःसा मंगलवाः रिपाेर्ट नेगेटिभ वयेवं अस्पतालं नं डिस्चार्ज याःगु दु ।

(ने. सं. ११४० चौलाथ्व ७/ वि. सं २०७६ चैत १८ मंगलवाः)