एभरेष्ट मिशन भ्यूया निदँ बुदिं
थिमि – एभरेष्ट मिशन भ्यु मल्टिप्रपोजपाखें संचालन जुयाच्वंगु वेबसाइट ‘एभरेष्ट मिशन डटकम’ निदँ क्यंगु लसताय् छगू ज्याझ्वः जुल । वेबसाइट निदँ क्यंगु बुन्हिया लसताय् जूगु ज्याझ्वलय् ख्वप क्षेत्र नं. २ या प्रतिनिधिसभा सदस्यलिसें पुलांम्ह उद्योगमन्त्री महेश बस्नेत मूपाहांकथं झायादीगु खः ।
ज्याझ्वलय् नवासें मूपाहां बस्नेतं हरेक मनूयाके सयेके सीके यायेगु चीज दइगु जक मखसे इमित अवसर नं बीमाः धासें गतिशील जुयाः न्ह्यानाच्वंगु शक्तिं हे जक थीथीकथंया पंगः वःसां उकियात अन्त्य यानाः सही थासय् थ्यंकेत सफल जुइ धयादिल ।
ज्याझ्वलय् पाहांकथं झायादीम्ह नेपाल मजदुर किसान पार्टी (नेमकिपा)या सांसद प्रेम सुवालं थः ज्याझ्वलय् ब्वति कायेखंगुयात गौरवया ईकथं कयागु खँ कनादिसें आः आलोचना यानाच्वनेगु स्वयां नं सयेके सीके यायेगु ज्या नेमकिपां यायेमाः धयादिल । थःगु धरातल थुइकाः जक संघसंस्था जक मखु राजनीतिक दलतय्सं नं पलाः न्ह्याकाः न्ह्यचिलेगु स्वयेमाः धासें वय्कलं सचेत यानादिल ।
एभरेष्ट मिशनया अध्यक्ष मय्जु लीला तामांगया अध्यक्षताय् जूगु ज्याझ्वलय् प्रतिनिधिसभा सदस्य मैना भण्डारी, प्रदेश नं. ३ या सदस्य मीना ज्ञवाली, प्रदेश नं. ४ या सदस्य राजीव पहाडी, सूर्यविनायक नगरपालिकाया उपप्रमुख जुना बस्नेतं थःथःगु नुगः खँ प्वंकुसे भिंतुना देछानादीगु खः ।
अथे हे नेकपा ख्वपया अध्यक्ष बच्चन देउजा, युवा संघ नेपालया वरिष्ठ उपाध्यक्ष किरण पौडेल, हनुमन्ते खुसि सफाइ अभियानया संयोजक रुद्र पौडेल, नेपाल पत्रकार महासंघ ख्वपया अध्यक्ष पुष्कर बुढाथोकी, वरिष्ठ पत्रकार इन्द्रबहादुर रिजाल, अखिल क्रान्तिकारीया केन्द्रीय अध्यक्ष रंजित तामांग व प्रेस चौतारी नेपालया केन्द्रीय दुजः सोम शर्मा बजगाईं लगायतं भिंतुना देछानादीगु खः ।
LEAVE YOUR COMMENTS