येँय् छेँ थुंगु खनाः चितवन त्रसित

भविष्यय् येँय् थें छेँ थुंके मबीत आः हे ग्यारेन्टी माग

येँ – चितवनय् धुर्मुस–सुन्तली फाउण्डेशनपाखें दयेका च्वंगु गौतम बुद्ध अन्तर्राष्ट्रिय क्रिकेट रंगशालाया विरोधय् स्थानीय जनता कुहां वःगुया मू कारण राजधानी येँय् सतक विस्तारया नामय् स्थानीय जनताया छेँय् डोजर चले याःगु खनाः ग्यानाः खः धइगु खँ सीदुगु दु । येँय् सतक विस्तारया नामय् चान्हय् समेत वयाः डोजर चले यानाः जनताया छेँ थुना छ्वःगु खनाः ग्यानाः हे अन च्वंपिं स्थानीय जनतां आः हे सतर्क जुयाः सः तःगु खँ सीदुगु दु ।

गुगु थासय् रंगशाला दयेकेत्यंगु खः, उकिया लिउने हे मनूतय् वस्ती दु । रंगशाला व उगु वस्तीया दथुं ३० मिटर तब्यागु लँ दयेकेगु योजना दयेका तःगु दु । तर थौैंकन्हय् रंगशालां कयातःगु जग्गा व उगु वस्तीया दथुइ धाःसा ८–१० मिटरया जक लँ दु । कन्हय् सतक तब्या यायेगु ज्या न्ह्याकल धाःसा सरकारं दयेकेधुंकूगु रंगशाला थुनी मखु, बरु स्थानीय जनताया वस्ती हे थुना छ्वइ ।

उकिं आः हे सतर्क जुयाः स्थानीय जनताया छेँ बचे यायेगु खःसा रंगशालां हे थाय् त्वःतेमाः धकाः उमिसं सः तःगु खः । रंगशालायात सतकया लागिं थाय् त्वःतेमाः धकाः जुयाच्वंगु आन्दोलनय् सहभागी स्थानीय चन्द्रकला रामदामं सञ्चार माध्यमय् स्पष्ट भासं धयादीगु दु, ‘काठमाडौंलय् सतक विस्तारया नामय् स्थानीय जनताया छेँ थुना बिउगु जिमिसं खनाच्वना ।

अन थें थन नं छेँ थुनेगु शुरु जुल धाःसा जिपिं चिचीधिकःपिं मस्त ज्वनाः गन च्वं वनेगु ?’येँय् थें अन नं कन्हय् वयाः छेँ थुनी धकाः हे स्थानीय जनतां रंगशाला दयेकीबलय् आः हे माक्व थाय् त्वःताः जक दयेकि धकाः धुर्मुस–सुन्तली फाउण्डेशनलिसे तःक्वःमछि वार्ता यानां नं समस्या समाधान मजूतले बाध्य जुयाः डोजर चले यानागु खँ उमिसं धाःगु दु ।

फाउण्डेशनलिसे जुइगु हरेक वार्ताय् स्थानीय वासिन्दातय्सं राजधानी येँय् पुलांगु योजना हयाः सतक विस्तार यायेगु धासें स्थानीय जनताया छेँ थुनाच्वंगु दु, अज्याःगु अवस्थाय् थन कन्हय् मवयेमा धकाः आः हे माःगु व्यवस्था यानादिसँ धकाः इनाप याःगु खः । अज्याःगु वार्ताय् धुर्मुसं आःयात लँ त्वःते फइ मखु, थःत हे रंगशालाया लागिं जग्गा मगाःनि धकाः धाइगु कारणं स्थानीय जनता झन् हे आक्रोशित जूगु खः ।

स्थानीय जनतां रंगशाला दयेकेत ग्वया तःगु जस्ता व तारया बार स्यंकेधुंकाः आः हानं सहमति जूगु दु । फाउण्डेशनं लँया लागिं थाय् त्वःतेगु सहमति क्यंगु जुयाः स्थानीय जनतां थःपिंसं थुना बिउगु पःखाः हानं थना बिउगु दु ।

सम्बन्धित बुखँ

LEAVE YOUR COMMENTS