विराटय् कवि योगेन्द्र प्रधानया अभिनन्दन
ख्वप – विराट नेपालभाषा साहित्य सम्मेलन गुथिया ग्वसालय् थनया भक्तपुर पार्टी भेन्यू गःपलिइ न्ह्याःगु न्यय्न्हय्क्वःगु विराट नेपालभाषा साहित्य सम्मेलनय् विराट गुथिया संस्थापक व सल्लाहकार कवि योगेन्द्र प्रधानयात अभिनन्दन पौ लःल्हासें हनेज्या याःगु दु ।
७७ दँया बैंसय् थ्यने धुंकूम्ह वय्कःयात विराट गुथिपाखें प्रदीप शाक्य, नेपाल साहित्य मन्दिरपाखें तिलकप्रकाश कायस्थ, कुतः पिकाकपाखें विमल ताम्राकार, याताजःपाखें सौरभ शाक्य, न्ह्यज्या खलः थिमिपाखें सुशिला श्रेष्ठ व सिद्धिदास प्रतिष्ठानपाखें नरेन्द्रभक्त हाडापिसं अभिनन्दन पौ लः ल्हानादिल ।
ज्याझ्वःया उलेज्या यानादिसें शताब्दी पुरुष सत्यमोहन जोशीं कवि डा. योगेन्द्र प्रधानया कविता अन्तर्राष्ट्रिय स्तरय् ब्वये बहःगु जूगु न्ह्यथंसे आः वय्कःया कवितायात नेपालभाषाय् जक सीमित मयासें खस व अंग्रेजी भासं नं अनुवाद यानाः नेपालभाषा साहित्ययात विश्वस्तरय् थ्यंकेमाःगु सुझाव बियादिल ।
विराट गुथिया पुलांम्ह नायः त्रिरत्न शाक्यं अभिनन्दित व्यक्तित्व योगेन्द्र प्रधानया व्यक्तित्व व कृतित्व बारे थःगु नुगः खँ कनादीगु खः ।
नकतिनि जक सार्वजनिक रुपं नागरिक अभिनन्दन जुयादीम्ह वरिष्ठ मानव अधिकारवादी नेता व नेवाः न्ह्यलुवा पद्मरत्न तुलाधर विशेष पाहां कथं झाःगु उगु ज्याझ्वलय् डा. पुष्पराज राजकर्णिकार, केशरत्न शाक्य, केदार सितु, रजनी मिला, नविनप्रकाश श्रेष्ठ, शरद कसाः, धर्मराज राजकर्णिकार, न्हुछेभक्त कवां, हरिशरण राजोपाध्याय, महेन्द्रगोपाल कर्माचार्य, शशीकला मानन्धर, महेशमान डंगोल, श्याम आशा, रेणु श्रेष्ठ, रिता महर्जन, शरद कसाःपिसं थःथःगु चिनाखँ न्यंकादीगु खः ।
ज्याझ्वलय् थुगुसिया एसइइ परीक्षाय् नेपालभाषा विषयय् दकलय् अप्वः ल्याः हःम्ह कन्या मन्दिर मावि, न्ह्यःखा, येँया विद्यार्थी मय्जु मलिना स्थापितया विराट नेपालभाषा साहित्य सम्मेलनया नायः कृष्णभक्त बोडें नेपालभाषा पदकपाखें सम्मानित यानादीगु खः । गुथिया हे नायः बोडेया सभापतित्वय् जूगु ज्याझ्वलय् न्वकु बाबुकाजी सांछेँ श्रेष्ठं लसकुस यानादीगु खःसा अभिनन्दित व्यक्तित्व योगेन्द्र प्रधान नापं प्रा. नर्मदेश्वर प्रधान, कन्या मावि विद्यार्थी मलिना स्थापितं न्ववानादिल ।
ज्याझ्वलय् अभिनन्दित व्यक्तित्व योगेन्द्र प्रधानयात कयाः कवि राजभाई जकःमिं च्वयादीगु म्येँयात पवित्र कसाः व जुजुकाजी रंजितं हालाः न्यंकादीगु खः । रोशनकुमार राजभण्डारी, सुरेन्द्र व्याञ्जु, रिता महर्जन व भरत नेपालीपिसं नं सम्मेलनया दथुइ दथुइ म्येँ
न्यंकादीगु खः ।
LEAVE YOUR COMMENTS