घाघः जुल पुलांगु फोहोरा
लानि पुखुली हाकुगु चा जायेकेगु तयारी
येँ – राजधानी येँ देय्या दकलय् सम्पदा मध्ये छगू लानिपुखूया पुनर्निर्माणया ज्या थौंकन्हय् तीव्र गतिं न्ह्यानाच्वंगु दुसा आः अन हाकुगु चा हयाः जायेकेगु तयारी शुरु जूगु दु । तर अन हाकुगु चा जायेकेगु न्हापा सार्क शिखर सम्मेलनया इलय् करोडौं दां फुकाः दयेकूगु लःया फोहोरा धाःसा घाघः जुयाच्वंगु खँ सीदुगु दु । सार्क शिखर सम्मेलनया इलय् तत्कालीन येँ महानगरपालिकां स्वंगूत्या करोड दां खर्च यानाः लानिपुखुली मत समेत च्याइगु लःया फोहोरा तःगु खः ।
सम्मेलनजःछि छुं न्हि थ्व फोहोर चले जुल । वयां लिपा बन्द जुल । अनंलि बन्द जक मखु ज्या हे लगे मजुइक स्यन । भुखाय् ब्वयाः लानिपुखू क्षतिग्रस्त जुइवं थ्व फोहोरा गन वं गनं जुल । आः लानिपुखू पुननिर्माणया ज्या शुरु जूबलय् धाःसा थ्व फोहोरा अनं चीकेमाःगु अवस्था वयाच्वंगु दु । राष्ट्रिय पुनर्निर्माण प्राधिकरण सूत्रं धाः कथं न्हापा महानगरपालिकां तःगु जुयाः आः थ्व फोहोरा अनं चीका बी माल धकाः महानगरपालिकायात हे इनाप याना छ्वःगु दु ।
तर महानगरपालिकां नं थ्व फोहोरा यंकाः गन तयेगु धकाः समस्या जूगुलिं उकिया बारे सहलह जुयाच्वंगु दनि । थ्व फोहोरा हानं दयेकाः चले यायेगु खःसा अझ यक्व खर्च तुइगु सम्भावना दुगु जुयाः पुनः सञ्चालनय् नं समस्या वइगु खँ धाःगु दु । उखे लानिपुखू पुनर्निर्माणया ज्या आः न्ह्याः वँवं अन दकलय् च्वंगु फि लिकायेगु ज्या जुयाच्वंगु दु । थ्व ज्या सिधयेवं अन हाकुगु चा हयाः करिब १८ इञ्च ति जायेक तयेगु तयारी जुयाच्वंगु दु ।
हाकुगु चा तयेवं अन लः थाकेत अःपुइगु खँ विज्ञतय्सं धाःगु दु । अन तयेगु लागिं ख्वपया दधिकोटं हाकुगु चा हयेगु तयारी जुयाच्वंगु दु । दधिकोटया चा परीक्षण यानाः नं स्वया तयेधुंकूगु दु । प्राधिकरण सूत्रं धाः कथं लानिपुखूया करिब १८ इञ्च ति लागा जायेकेगु लागिं १२०० स्वयां अप्वः टिप चा मालीगु खनेदु । दधिकोटय् उकिया लागिं माःगु व्यवस्था नं याना तयेधुंकूगु दु ।
आः हाकुगु चा हयाः चायेकल धकाः आः वइगु स्वन्ति नखः तकया दुने अन छुं भचा जूसां लः जायेके फइगु सम्भावना दु । यदि स्वन्ति नखः तकया दुने लः जायेके फत धाःसा किपापुजा कुन्हु मनूतय्त दुछ्वयाः बालगोपालेश्वर देगलय् तक छ्वयेगु योजना दयेकाच्वंगु खँ नं धाःगु दु । दथुइ च्वंगु बालगोपालेश्वर देगः हानं पुलांगु मल्लकालीन शिखर शैलीं दयेकेगु कथं डिजायन तयार जुयाच्वंगु दु ।
LEAVE YOUR COMMENTS