११,३६० करोड भारुया बै‌क घोटाला

येँ– नेपाःया एभरेस्ट बैंकया सह–संचालक जुयाच्वंगु भारतया पञ्जाब नेशनल बैंकया मुम्बइस्थित ब्रीच क्यान्डी ब्रान्चय् ११,३६० करोड भारुया घोटाला जूगु दु ।
बैंकं छगू विज्ञप्ति जारी यासें धाःगु दु, ‘थ्व घोटालाय् जूगु कालबिल छुं विशेष मनूतय् फायदाया निंतिं जूगु दु । थुकी बैंकया कर्मचारी व बैंकय् खाता दुपिं ग्राहकतय् मिलोमतो दु । थ्व हे कालबिलया आधारय् मेमेगु छुं बैंकं नं छुं खातावालातय्त विदेशय् ध्यबा भुक्तान याःगु खनेदु ।’

पञ्जाब नेशनल बैंक भारतया तःधंगु बैंकत मध्ये छगू लाः । बैंकं घोटाला जूगु खँ धाःसां थुकी संलग्नपिनिगु नां धाःसा खुलस्त मयाःनि । तर बैंक थ्व बारे आवश्यक थासय् सुचं बीधुनागु व थुकी बैंकया जिम्मेदारी गुलि दुगु स्वयेमानिगु खँ धाःगु दु ।

थ्व बैंक भारतीय व्यवसायी नीरव मोदीं याःगु फर्जी कारोवारयात कयाः वंगु वालंनिसें तिनि छानविन जूगु खः । थ्वहे दथुइ थपाय्धंगु फर्जी कारोवारया खँ पिहांवःगु खः । वंगु वालय् छानविन सुरु याःपिं सिबीआईया अधिकारीतय्सं नीरव मोदी, वया किजा, कला व वया पार्टनरपिंसं पंजाब नेशनल बैंकपाखें २८० करोड ठगे याःगु खँ धाःगु दु । नीरव भारतय् नांजाःगु हिरा व्यापारी खः ।