स्वन्ति न्ह्यःने वःसां लुँया व्यापार शून्य

येँ (नेपालभाषा टाइम्स)- मोहनिया इलय् स्यनाच्वंगु लुँवहःया बजाः स्वन्ति नखःबलय् नं सुधार मजुइगु संकेत खने दया वःगु दु । बजाः विश्लेषक तेजरत्न शाक्यया कथं मोहनि स्वयां छुं भचा व्यापार अप्वःगु खनेदुसां खास हे व्यापार धाःसा बांलानाच्वंगु मदु ।

नेपालभाषा टाइम्स लिसे खँ ल्हासें वय्कलं न्हापा जूसा मोहनि स्वन्तिया इलय् लुँया ब्यापार थहां वनीगु खःसां थुगुसी धाःसा लुँया भाः थहां वंगुलिं व्यापार म्हो जुयाच्वंगु खँ कनादिल ।

बजारय् मनूत हुलमुल जुयाच्वंसां ब्यापार धाःसा जुयाच्वंगु मदु । न्हूसतक जःखःया लुँ पसलय् धाःसा मनूत हुल खने दु नि धइगु न्ह्यसलय् वय्कलं धयादिल, ‘जिं अनया व्यापारीतय्के नं न्यनागु खः । तर खास हे व्यापार दु मधाः ।’

वय्कलं कनादी कथं थौंकन्हय् लुँ न्यायेगु नितिं सुनचाँदी व्यवसायी महासंघय् पौ काः वइपिं नं मदु । लुँ न्यायेगु नितिं महासंघया पौ माः । न्हापा न्हापा जूसा मोहनि स्वन्तिया इलय् न्हिं ३० किलो तक लुँ खपत जुयाच्वंगु खःसा थुगुसी २० किलो हे खपत मजूगु जानकारी नं वय्कलं बियादिल ।

थ्वहे झ्वलय् म्हिगः नं नेपाःया लुँ वहः बजारय् लुँया भाः कुहां वःगु दु । वंगु छवाः न्ह्यः तक निरन्तर रुपं थहां वनाच्वंगु लुँया भाः वंगु आइतवाःनिसें कुहां वयेगु शुरु जूगु खः । म्हिगः लुँ तोलां प्यसः कुहां वःगु खः। म्हिगः लुँ तोलां १ लाख १५ हजार तकां कारोबार जूगु खः ।