भाः थहां वनाः नेपालय् पेट्रोल हे मी मफइगु अवस्था वयेफु
येँ- रुस– युक्रेन दथुया युद्धया कारणं लगातार चिकंया भाः थहां वनाः नेपालय् नं प्रत्यक्ष लिच्वः लायेगु सुरु जूगु दु । निगू देय् दथुया युद्धं यानाः अन्तर्राष्ट्रिय बजारय् हे चिकं भाः थहां वनाच्वंगु दुसा नेपालय् नं पेट्रोल लिटरया १५० तका थ्यनेधुंकूगु दु ।
आन्तरिक बजारय् पेट्रोलया भाः थकाःसां अन्तर्राष्ट्रिय बजारय् नं चिकंया भाः लगातार थहां वनाच्वंगुलिं नेपाल आयल निगमं घाटाय् हे चिकं मी मालाच्वंगु खँ धाःगु दु । अन्तर्राष्ट्रिय बजारय् अझ हे भाः थहां वनीगु सम्भावना दुगुलिं आः चिकं हे म्हो जक मी मालीगु अवस्था तक वयेफुगु खँ आयल निगमं धयाहःगु दु ।
अन्तर्राष्ट्रिय बजारय् चिकंया भाः आः प्रति ब्यारेल १३९ तका थ्यनाच्वंगु दुसा रुस–युक्रेन युद्ध जुया हे च्वन धाःसा प्रति ब्यारेल ३०० तका तक थ्यनेफुगु अनुमान जुयाच्वंगु दु । थ्व अवस्थाय् नेपालय् पेट्रोल मी हे मफइगु खँ धासें आयल निगमं चिकं वितरणया निंतिं थीथी उपायत मालेगु सुरु यानाहःगु दु ।
आःया अवस्थाय् निगमयात चिकं मियाः झिंन्यान्हुया दुने २ अर्ब ५० करोड तकाया घाटा जुयाच्वंगु दु । थ्व अवस्थाय् चिकं न्यायेत भारतीय आयल निगम (आइओसी)यात ध्यबा तकं पुले मफइगु स्थिति वयेफु ।
निगमया प्रवक्ता विनीतमणि उपाध्यायया कथं आइओसीयात ध्यबा पुलेत फेब्रुअरीइ १ अर्ब ८० करोड तका निगमया स्थिरीकरण कोषं लिकायेधुंकूगु दुसा मार्चया निंतिं ४ अर्ब २५ करोड तका लिकायेत्यंगु दु । थ्वयां लिपा मेगु पालय् आइओसीयात पुलेत निगमयाके ध्यबा दइ मखु ।
अथे जूगुलिं थौंकन्हय् थें हे चिकंया आपूर्ति यानाच्वनेगु खःसा अन्तर्राष्ट्रिय बजाः कथं नेपालय् नं भाः थकायेमालीगु जुइ, कि मखुसा सरकारं मगाःगु ध्यबा पुला बीमाःगु जुइ । थ्व निगुलिं मजुल धाःसा चिकंया आपूर्ति हे म्हो यायेमालीगु खँ निगमया निमित्त कार्यकारी निर्देशक सुशील भट्टराईं धयादीगु दु ।
बीबीसीलिसे खँ ल्हासें वय्कलं धयादीगु दु, ‘माग कथं चिकं बियाच्वनेगु खःसा कि भाः थकायेमाल, कि चिकं न्यायेत मेगु छुं स्रोतं ध्यबा वयेमाल । थुकिया निंतिं कि सरकारी त्यासा बीमाल, कि मखुसा बुलुहुँ पेट्रोलियम पदार्थया खपत हे म्हो यायेगु बारे बिचाः यायेमाःगु अवस्था वइ ।’
‘छुं ई अत्यावश्यक क्षेत्रयात जक चिकं बीगु, आवश्यक मदुपिंत चिकं मबीगु नं याये मालेफु’ वय्कलं धयादीगु दु ।
मेखे अर्थविद् लिसें पुलांम्ह अर्थसचिव रामेश्वर खनालं धाःसा अत्यावश्यक क्षेत्रयात जक चिकं बियाः मेपिंत मबीगु यात धाःसा उकिं लिपा थ्यंकं अर्थतन्त्रय् लिच्वः लाइगु खँ धयादीगु दु ।
निगमया प्रवक्ता उपाध्यायया कथं मंगलवाः तक निगमया भण्डारय् न्यान्हुयात गाक्क पेट्रोल व च्यान्हुयात गाक्क डिजेल दु । निगमयाके देय्न्यंकं यानाः ६८ हजार किलोलिटर भन्डारण यायेगु क्षमता दु ।
LEAVE YOUR COMMENTS