नेम्बाङं नं न्ववाना हल

येँ – प्रधानमन्त्री केपी ओलीं संसद विघटनया सिफारिस यायेवं सञ्चार माध्यमय् मवसे बेपत्ता जुया च्वनादीम्ह संविधानसभाया अध्यक्ष लिसें नेकपाया उपनेता सुवास नेम्बाङं नं सार्वजनिक रुपं थःगु बिचाः तया हःगु दु। म्हिगः जूगु छगू ज्याझ्वलय् न्ववासें प्रधानमन्त्रीं संसद भंग याये दइ मखु धकाः न्हापा थम्हं धयागु खःसां आःया अवस्था धाःसा अबले स्वयां पाःगु बिचाः तयादीगु दु ।

प्रधानमन्त्रीं संसद भंग याये दइ मखु व आः अज्याःगु प्रावधान संविधानय् तयागु दु धकाः थम्हं छगू ज्याझ्वलय् न्ववानागु खँया भिडियो आः भाइरल जुयाच्वंगु खँ न्ह्यथँसें भाजु नेम्वाङं धयादीगु दु, ‘व जिं हे धयागु खँ खः । तर अबले उगु खँ धयागु ई व आःया ई पायेधुंकूगु दु ।’

विज्ञ सूत्रतय्सं धाः कथं सार्वजनिक जीवनय् दुम्ह भाजु नेम्बाङं न्हापा सार्वजनिक रूपं गुगु खँ धयादीगु खः, लिपा हानं सार्वजनिक रूपं उकिया अःखः न्ववायेबलय् जुइगु ‘विबन्धन’ धइगु कानुनी व्यवधानय् वय्कः फँसे जुयादीगु दु । विबन्धनसम्बन्धी व्यवस्था कथं सार्वजनिक पदय् दुपिं मनूतय्सं न्हापा गुगु खँ न्ववाःगु खः लिपा थःत फाइद जुल धायेवं उकिया अःखः न्ववाये दइ मखु ।

सम्बन्धित बुखँ

LEAVE YOUR COMMENTS