स्वन्ति नखः, म्हपुजा व मन्दःयात कयाः न्वचु ज्याझ्वः

येँ – उदाय् समाजया ग्वसालय् स्वन्ति नखः, म्हपुजा व मन्दःया महत्वयात कयाः छगू प्रवचनात्मक ज्याझ्वः जुल । ज्याझ्वलय् स्वन्ति, म्हपुजा व मन्दया महत्वया महत्वलिसें उकिया थीथी पक्षयात कयाः विज्ञपिंसं थःथःगु नुगःखँ प्वंकादीगु खः ।

वाङ्मय शताब्दी पुरुष नापं संस्कृतिविद् डा. सत्यमोहन जोशीं स्वन्ति नखः व म्हपुजाया बारे व लुम्बिनी बौद्ध विश्वविद्यालयया उपकुलपति प्रा.डा.नरेशमान वज्राचार्यं मन्दःया विषयय् न्वचु न्ह्यब्वयादीगु खः ।

ज्याझ्वलय् शताब्दी पुरुष जोशीं युनेस्कोया धापूकथं संस्कृति धइगु मूर्त व अमूर्त निगुलिं दयाच्वनिगुलिं झीसं हना वयाच्वनागु सांस्कृतिक नखतं मानव सभ्यता गन थ्यनाच्वन धकाः क्यनाच्वनी धयादिल । अथे हे प्रा.डा. वज्राचार्यं मन्दः च्वयेबलय् काय, वाक, चित्तया स्वरुप कथं च्वयातःगु मन्दःया जक महत्व दइगु धारणा तयाबिज्याःगु खः ।

उदाय समाजया मूछ्यांजे स्वयम्भूरत्न तुलाधरया सभापतित्वय् न्ह्याःगु ज्याझ्वलय् मूपाहां प्रदेश नं. ३ प्रदेशसभा सदस्य राजेश शाक्य झायादीगु खः । उदाय् समाज मिसा पुचःया नकिं कीर्ति तुलाधरं पाहांपिंत खादा न्ययकादीगु ज्याझ्वलय् उदाय् म्युजियमया संयोजक डा. सुमन कमल तुलाधरं नं थःगु नुगः खँ तयादीगु खः ।

थुगु ज्याझ्वःया अन्तय् उदाय् समाजपाखें मदुम्ह मानवाधिकारवादी पद्म रत्न तुलाधर मदुगलिइ प्रा.डा. नरेशमान बज्राचार्यजुयात धारणी नं ब्वंका बिज्यागु खः । ज्याझ्वः थनया जमःस्थित ग्राण्डी सिटी हस्पिटल ज्योति भवनय् जूगु खः ।

सम्बन्धित बुखँ

LEAVE YOUR COMMENTS